ދިވެހި ރައްޔިތުންގެ ޕާޓީ، އެމްޑީޕީގެ ޗެއާޕާސަން ކަމުގައި ހުންނަ މީހަކަށް ކުރިއަށް އޮންނަ ރިޔާސީ އިންތިހާބުގައި ވާދަނުކުރެވޭނެގޮތް ހަދާނަން ކަމަށް އެމްޑީޕީގެ ޗެއާޕާސަންކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެެވެ

'މީކާއީލްގެ ޓީމުގެ ފަރާތުން މިރޭ ބޭއްވި، "އިތުބާރު މާލެސިޓީ" ކެމްޕެއިން ޖަލްސާގައި ވާހަކަދައްކަވަމުން މީކާއީލް ވިދާޅުވީ، އެމްޑީޕީގެ އެތެރޭގައި އިސްލާހްކުރަންޖެހޭ ވަރަށް ގިނަ ކަންކަން އެބަހުރިކަމަށާއި، ޗެއާޕާސަންކަމުގެ މަގާމަށް އަންނަނީ ޕާޓީ ހަރުދަނާކޮށް މެމްބަރުންނަށް ޕާޓީގެ ތެރެއިން ބާރުބެރިކަން ހޯދައިދިނުމަށް ކަމަށެވެ. އެގޮތުން ޕާޓީ އިސްލާހްކުރުމަށް ގިނަ ކަންތައްތަކެއް ކުރުމަށް ނިންމަވާފައިވާކަމަށް މީކާއީލް ވިދާޅުވިއެވެ. މިގޮތުން އެމްޑީޕީގެ ޗެއާޕާސަން ކަމުގައި ހުންނަ މީހަކަށް ކުރިއަށް އޮންނަ ރިޔާސީ އިންތިހާބުގައި ވާދަނުކުރެވޭނެގޮތް ހެދުމަށް އިސްލާހް ހުށަހަޅާނޭކަމަށް މީކާއީލް ވިދާޅުވިއެވެ.

މީކާއީލް ވިދާޅުވީ، އެމްޑީޕީގެ ޗެއަރޕާސަންގެ މަޤާމުގައި ހުންނަ މީހަކީ ދެފުށްފެންނަ، ފުދުންތެރި ޕާޓީއަކަށް ހަދާދޭނަންކަމަށެވެ.

ޗެއާޕާސަންކަމަށް އިންތިހާބު ކޮށްފިނަމަ، ޕާޓީއަށް ލިބޭ ފައިސާ ޚަރަދުކުރާ ގޮތް އާންމު މެމްބަރުންނަށް ކޮންމެ މަހަކު ހިސާބުތައް އާއްމު ކުރާނޭކަމަށް މީކާއީލް ވިދާޅުވިއެވެ. މީގެ އިތުރުން ދަޢުލަތުގެ ބަޖެޓަށް ބަރޯސާވެ، ވާ މިންވަރު ކުޑަކޮށް، ދެމެހެއްޓޭނެ ގޮތެއްގައި ޕާޓީގެ ކަންކަން ކުރިއަށްދާނެ އޮނިގަނޑެއް ހުށަހަޅާނޭ ކަމަށާއި، ޕާޓީގެ ދާއިމީ މައި މަރުކަޒެއް މާލޭގައި ޤާއިމްކޮށް، ކުލީގެ އަޅުވެރިކަމުން ޕާޓީ މިނިވަންކޮށްދޭނޭ ކަމަށްވެސް މީކާއީލް ވިދާޅުިވިއެވެ.

އެމްޑީޕީގެ ޗެއާޕާސަންކަމުގެ މަގާމަށް ކުރިމަތިލީ ފަހަރެއްގައިވެސް ވެރިކަމަށް ކުރިމަތިލާން ނޫންކަން ފާހަގަކުރަމުން މީކާއީލް ވިދާޅުވީ، ކުރިއަށް އޮތްތަނުގައި އޭނާ އެންމެބޮޑު އިސްކަމެއް ދޭނީ، ޕާޓީގައި ސިޔާސީ ލީޑަރުން ބިނާކުރުމަށް ކަމަށެވެ. އެގޮތުން އެމްޑީޕީއަށް ދައުލަތުން ލިބޭ ފައިސާގެ ބައެއް، ޒުވާނުންގެ ހިތްވަރާ، އަންހެނުންގެ ރޫޙާ ހިއްސާކުރާނޭ ކަމަށް އޭނާ ފާހަގަކުރެއްވިއެވެ.