ވ. އަތޮޅަށް ޑައިވިނަށް ގޮސް އުޅެނިކޮށް ގެއްލުނު ޑައިވަރުންގެ ތެރޭގައި  އިޓަލީގެ ޔުނިވާސިޓީ އޮފް ޖެނޯއާގެ މެރިން ބަޔޮލޮޖީ ޕްރޮފެސަރަކާއި، އޭނާގެ ދަރިފުޅުގެ އިތުރުން ޒުވާން ދެ ރިސާޗަރުން ހިމެނޭ ކަމަށް އެ ޔުނިވާސިޓީން ބުނެފިއެވެ.

ޑައިވިންއަށް ގޮސް އުޅެނިކޮށް ފަސް މީހުން ގެއްލިފައިވާއިރު، އެތަނުން އެކެއްގެ ހަށިގަނޑު ވަނީ ފެނިފައެވެ. އަދި، ބާކީ ތިބި މީހުން ކޭވްއެއްގެ ތެރޭގައި ތާށިވެފައިވާ ކަމަށް ބެލެވޭ ކަމަށް އެމްއެންޑީއެފުން ވަނީ ބުނެފައެވެ.

ބީބީސީ ވޯލްޑްއިން ރިޕޯޓްކޮށްފައިވާ ގޮތުގައި، މި ހާދިސާގައި ތާށިވި މީހުންގެ ތެރޭގައި އިޓަލީގެ ޔުނިވާސިޓީ އޮފް ޖެނޯއާގެ މެރިން ބަޔޮލޮޖީ ޕްރޮފެސަރަކާއި، އޭނާގެ ދަރިފުޅުގެ އިތުރުން ޒުވާން ދެ ރިސާޗަރުން ހިމެނެއެވެ.

މި ހިތާމަވެރި ހާދިސާއާ ގުޅިގެން ޔުނިވާސިޓީ އޮފް ޖެނޯއާއިން އެކްސްގައި ކުރި ޕޯސްޓެއްގައި ވަނީ، މި ހާދިސާގައި ކުއްލި ގޮތަކަށް ވަކިވެދިޔަ ޕްރޮފެސަރު މޮނިކާ މޮންޓެފަލްކޯނޭ އާއި، އޭނާގެ ދަރިފުޅު ޖޯޖިއާ ސޮމަކަލްގެ އިތުރުން މިއުރިއަލް އޮޑެނީނޯ އަދި ފެޑެރީކޯ ގުއަލްޓިއޭރީގެ އާއިލާތަކަށް ވަނީ ތައުޒިޔާ ފޮނުވާފައެވެ.

މޮނިކާ އަކީ ކަނޑުތަކަށް އޮންނަ ލޯތްބާއި ޚާއްޞަ ޝައުޤުވެރިކަމަށް މަޝްހޫރު މީހެކެވެ. މީގެ އިތުރުން، އޭނާއަކީ "ތަލައްސާ" (Talassa)، "ގޯސްޓްނެޓް" (GhostNet) އަދި "އެމް.އީ.އާރް" (MER "A16-A18") ފަދަ ކަނޑުގެ ދިރާސާތަކާ ގުޅުންހުރި މުހިންމު މަޝްރޫޢުތަކެއްގައި އިސް ދައުރެއް އަދާކުރައްވާފައިވާ މީހެކެވެ.

މި ހާދިސާގެ ރިޕޯޓް އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ އިއްޔެ މެންދުރުފަހު 13:45 ހާއިރުއެވެ.

އެމްއެންޑީއެފުން ބުނި ގޮތުގައި، ގެއްލުނު މީހުން ހޯދުމުގެ މަސައްކަތް ކަނޑާއި ވައިގެ މަގުން ދަނީ ކުރަމުންނެވެ. މި އޮޕަރޭޝަނުގައި ސަފާރީއަކާއި، ވ. އަތޮޅު ޕޮލިސް ސްޓޭޝަންގެ އިތުރުން އަލިމަތާ ރިސޯޓުގެ އެހީތެރިކަން ލިބެމުންދާ ކަމަށް ސިފައިން މައުލޫމާތު ދެއެވެ.

ގެއްލުނު ފަސް މީހުންގެ ތެރެއިން އެކެއްގެ ހަށިގަނޑު ފެނިފައިވަނީ އިއްޔެ އިރުއޮއްސި 18:13 ހާއިރު، އެމީހުން ހޯދުމުގެ މަސައްކަތުގައި ހަރަކާތްތެރިވި ސަފާރީގެ ޑައިވަރުންނަށެވެ. ގާތްގަނޑަކަށް 60 މީޓަރުގެ އަޑިން ކޭވްއެއްގެ ތެރެއިން ފެނުނު އެ މީހާގެ ހަށިގަނޑު މިހާރު ވަނީ ވ. ފުލިދޫ ހެލްތު ސެންޓަރަށް ގެންގޮސްފައެވެ.

ސިފައިން ލަފާކުރާ ގޮތުގައި ބާކީ ތިބި ހަތަރު ޑައިވަރުން ތިބީ ގާތްގަނޑަކަށް 200 ފޫޓު ދިގު މި ކޭވްގެ ތެރޭގައެވެ.

މިއީ ވަރަށް ނުރައްކާތެރި "ހައި ރިސްކް" އޮޕަރޭޝަނަކަށް ވުމުން، ކޯސްޓްގާޑުގެ އިތުރު ޑައިވަރުންނާއި ބޭނުންވާ ޚާއްޞަ ސާމާނު މިހާރު ވަނީ އެ ސަރަހައްދަށް ފޮނުވާފައެވެ. އަދި މި އޮޕަރޭޝަން ނިމެންދެން އެމްއެންޑީއެފް ކޯސްޓްގާޑް ޝިޕް "ޣާޒީ" އެ ސަރަޙައްދުގައި ހަރަކާތްތެރިވާނެ ކަމަށް އެމްއެންޑީއެފުން ބުނެފައިވެއެވެ.