މާފިލާފުށިން ފުރައިގެން މާލެ އަންނަނިކޮށް ފަޅައިގެންގޮސް ދިޔަވި ލޯންޗުގައި ތިބި ހުރިހާ ދަރިވަރުން މާލެ ގެނެސްފައިވާކަމަށް އެމްއެންޑީއެފުން ބުނެފިއެވެ.

 ނޭޝަނަލް ސަރވިސް އިނީޝަލް ޓްރެއިނިންގ ކޯސް-2 ގެ ދަރިވަރުން މިއަދު މާލެއަށް ދަތުރުކުރި ލޯންޗު ފަޅައިގެންގޮސް ދިޔަވުމުގެ ސަބަބުން އެ ލޯންޗުގައި ތިބި ދަރިވަރުން ވަނީ ލައިފްޖެކެޓް އަޅުވައި ކަނޑަށް ބާލާފައެވެ. އެއަށްފަހު އިތުރު ލޯންޗްތައް ގެނެސް އެ ދަރިވަރޔުން ވަނީ މާލެ ގެންގޮސްފައެވެ.

ފުލުހުން ބުނީ ލޯންޗެއް ފަޅައިގެންގޮސް ހިނގި މި ހާދިސާގެ ރިޕޯޓް ލިބުނީ މިއަދުގެ 18:04 އެހައިކަންހާއިރު ކަމަށެވެ. 

އެމްއެންޑީއެފުން ބުނެފައިވަނީ ލޯންޗެއް ފަޅައިގެންދިޔަ ހާދިސާގައި ކަނޑުވެފައިވަނީ ނޭޝަނަލް ސަރވިސް އިނީޝަލް ޓްރެއިނިންގ ކޯސް-2 ގެ ދަރިވަރުން ކަމަށެވެ. ލޯންޗު ފަޅައިގެން ދިޔައީ، މާފިލާފުށިން މާލެއަށް ދަތުރުކުރަނިކޮށް ހުޅުމާލެއާ ހިސާބުންކަމަށް އެމްއެންޑީއެފުން ބުންޏެވެ. 

މި ހާދިސާގައި ކުއްޖަކަށް އަނިޔާވިކަމުގެ ރިޕޯޓެއް ނުލިބެއެވެ. ފުލުހުން ބުނެފައިވަނީ ބައެއް ދަރިވަރުން މާލެ ގެނސްފައިވަނީ އެ މުއައްސަސާގެ އެހީތެރިކަމާއެކުގައި ކަމަށެވެ.

މި ހާދިސާގައި ލޯންޗު ފަޅައިގެން ދިޔަ ސަބަބެއް އަދި ނޭނގެއެވެ. އަދި އެ ދަރިވަރުން ކަނޑުމަތީގައި ހޭދަކުރީ ކިހާ ވަގުތެއްކަމެއްވެސް ކަމާބެހޭ އިދާރާތަކުން ނުބުނެއެވެ. މީގެ ކުޑައިރުކޮޅެއް ކުރިން އެމްއެންޑީއެފުން ބުނީ ހުރިހާ ދަރިވަރުންވެސް މިހާރު މާލެ ގެނެސްފައިވާކަމަށެވެ.