ޕީއެންސީ މެންބަރުންގެ ވޯޓާއެކު މި އަހަރު ނިމުމުގެކުރީން ވެރިކަން ބަދަލުކުރާނެ ކަމުގައި ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.

ނަޝީދު މިހެން ވިދާޅުވީ އައްޑޫ ހިތަދޫ އުތުރު ދާއިރާގެ އެމްޑީޕީގެ ކެންޑިޑޭޓްގެ މާލޭ ޖަލްސާގައި ވާހަކަފުޅު ދައްކަވަމުންނެވެ. އެމްޑީޕީ ހަރުގޭގައި އޮތް ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ މި އަހަރު ނިމުމުގެ ކުރީން މިވެރިކަން ބަދަލު ކުރަން ޖެހޭ ކަމަށެވެ.

އަދި އެކަން ކުރެވޭނެ ކަމުގެ ޔަގީންކަން އެބަ އޮތް ކަމުގައި ވިދާޅުވި އެވެ. ނަޝީދު ވިދާޅުވީ ރައީސް މުޢިއްޒުގެ އިތުބާރު ނެތް ކަމުގެ ވޯޓް ނެގޭ މިންވަރަށް މެންބަރުންގެ ސޮއި ހޯއްދަވާނެ ކަމަށެވެ.

"ސޯބެ ހޮވަން މި އުޅެނީ މިވެރިކަން ބަދަލުކުރަން. މި އަހަރު ނިމުމުގެ ކުރީގައި މިވެރިކަން ބަދަލުކުރާން ވެއްޖޭ. ހާސްވެ ނުލައްވާ!! ރައްޔިތުންގެ މަޖިލީހުގެ އަޣްލަބިއްޔަތު, ތަނަވަސް އަޣްލަބިއްޔަތު, އިތުބާރު ނެތް ކަމަށް ނެގޭ މިންވަރަށް, ތިންބައިކުޅަ ދެބައި އަޅުގަނޑުމެންގެ އަތަށް ގެންނާނަން އިރާދަކުރެއްވިއްޔާ,"

ރައީސް މުޢިއްޒުވެރިކަން ބަދަލުކުރަން އެމްޑީޕީއާއެކު ކުރީގެ ރައީސް ޔާމީން ވެސް ހުންނެވީ އެކުގައި ކަމަށާ އަދި ޕީއެންސީގެ މަޖިލީސް މެންބަރުން ވެސް ޕާޓީ ބަދަލު ކުރައްވާނެ ކަމަށް ވިދާޅުވި އެވެ.

"މި ރައީސަށް އިތުބާރު ނެތް ކަމަށް އެ ބޭފުޅުން [ޕީއެންސީގެ މަޖިލީސް މެންބަރުން] ސޮއިކުރައްވާނެ," ނަޝީދު ވިދާޅުވި އެވެ.

ނަޝީދު ވިދާޅުވީ ރައީސްގެ އިތުބާރު ނެތް ކަމުގެ ގަރާރުގައި ފުރަތަމަ ސޮއިކުރައްވާނީ ސޯބެ ކަމަށެވެ. އަދި ވިދާޅުވީ އެފްރިކާގައި ހުންނަވާފައި ވަޑައިގެންނެވީ ކުރަން ޖެހޭ ކަންކަން ހުރުމުން ކަމަށެވެ.

އެކަންކަން ކުރައްވާނެ ކަމަށާ އެއީ ސަމާސާއެއް ނޫން ކަމުގައިވެސް ވިދާޅުވި އެވެ.

"އަޅުގަނޑުމެން މިކަމާ މިއުޅެނީ ކުޑަކޮށެެއް ނޫން, ސަމާސާ ކޮނެއް ނޫން, މަޖަލަކަށްވެސް ނޫން," މިރޭގެ ޖަލްސާގައި ނަޝީދު ވިދާޅުވި އެވެ.