އިންސާނީ އެހީގެ ސުލްހަވެރި މިޝަނެއް ކަމަށްވާ ގްލޯބަލް ސުމޫދު ފްލޮޓިލާއަށް އިސްތިއުމާރީ އިސްރާއީލުން ހަމަލާ ދިން މައްސަލައިގައި ރާއްޖެ ހިމެނޭ ގޮތަށް 10 ޤައުމެއްގެ ޚާރިޖީ ވަޒީރުން އެ ޢަމަލު އެންމެ ހަރުކަށި ޢިބާރާތުން ކުށްވެރިކޮށްފިއެވެ.
ޤައުމުތަކުގެ ގުޅިގެން ނެރުނު ބަޔާނުގައި ބުނެފައިވަނީ، ލޯބަލް ސުމޫދު ފްލޮޓިލާއަކީ ފަލަސްޠީނުގެ ރައްޔިތުންނަށް ކުރިމަތިވެފައިވާ ހިތާމަވެރި އިންސާނީ ކާރިސާއަށް ބައިނަލްއަޤުވާމީ ސަމާލުކަން ހޯދުމަށް ހިންގާ ސުލްހަވެރި މަދަނީ އިންސާނީ އެހީގެ އިސްނެގުމެކެވެ.
ދިވެހިރާއްޖެ، ބަންގްލަދޭޝް، ބްރެޒިލް، ކޮލޮމްބިއާ، އިންޑޮނީޝިއާ، އުރުދުން، ލީބިޔާ، ޕާކިސްތާން، ސްޕެއިން އަދި ތުރުކީގެ ޚާރިޖީ ވަޒީރުންގެ ފަރާތުން ނެރުނު މި ބަޔާނުގައި ވަނީ ބައިނަލްއަޤުވާމީ ކަނޑުގެ ސަރަޙައްދުގައި ކުރީގެ ފްލޮޓިލާތަކަށް ވެސް އިސްރާއީލުން ހުރަސްއެޅިކަން ކަންބޮޑުވުމާ އެކު ފާހަގަކޮށް، މަދަނީ އުޅަނދުފަހަރާއި އިންސާނީ އެހީގެ ޙަރަކާތްތެރިންނަށް އަމާޒުކޮށް ދެމުންދާ ޢުދުވާނީ ޢަމަލުތައް ކުށްވެރިކޮށްފައެވެ.
އުޅަނދުފަހަރަށް ހަމަލާ ދިނުމާއި ޙަރަކާތްތެރިން ގޮތެއް ފޮތެއް ނެތި ހައްޔަރުކުރުން ފަދަ ޢަމަލުތަކަކީ ބައިނަލްއަޤުވާމީ ޤާނޫނާއި ބައިނަލްއަޤުވާމީ އިންސާނީ ޤާނޫނާ ފާޅުކަން ބޮޑު ގޮތެއްގައި ޚިލާފު ޢަމަލުތަކެއް ކަމަށް ބަޔާނުގައި ބުނެފައިވެއެވެ.
ފްލޮޓިލާގައި ބައިވެރިވި މަދަނީ ފަރާތްތަކުގެ ރައްކާތެރިކަމާ މެދު ކަންބޮޑުވުން ފާޅުކޮށް، ވަޒީރުން ވަނީ ހައްޔަރުކޮށްފައިވާ ހުރިހާ ޙަރަކާތްތެރިން ވަގުތުން ދޫކޮށްލައި، އެ މީހުންގެ ޙައްޤުތަކާއި ކަރާމާތަށް ފުރިހަމައަށް އިޙުތިރާމު ކުރުމަށް ގޮވާލައިފައެވެ.
އަދި ސުލްހަވެރި އިންސާނީ އެހީގެ މިޝަންތަކަށް ތަކުރާރުކޮށް ހަމަލާ ދިނުމަކީ ބައިނަލްއަޤުވާމީ ޤާނޫނާއި ކަނޑުދަތުރުފަތުރުގެ މިނިވަންކަމަށް ބެލުމެއް ނެތް ކަމުގެ ހެއްކެއް ކަމަށް ފާހަގަކޮށް، ބައިނަލްއަޤުވާމީ މުޖުތަމަޢުން ޤާނޫނީ އަދި އަޚުލާޤީ ޒިންމާ ނެގުމަށާއި، މި ފަދަ އިންތިހާކުތައް ހުއްޓުވައި ޖަވާބުދާރީ ކުރުވުމަށް ފިޔަވަޅު އެޅުމަށް ވަޒީރުން ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
