މާލޭ ވެޓް މާކެޓް ކޮމްޕްލެކްސް ތަރައްގީ ކުރުމުގެ މަސައްކަތް ނުފެށި ލަސްވަނީ ސިޓީ ކައުންސިލުން ބިން ހަވާލުނުކޮށްގެން ކަމަށް ބިނާރާ، ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން ބުނެފި އެވެ.

މަސްމާރުކޭޓާއި ތަރުކާރީ މާރުކޭޓް ހިމެނޭހެން އަޅަން ހަމަޖެހިފައިވާ ޒަމާނީ މި އިމާރާތުގެ މަސައްކަތް ހަވާލުކޮށްފައިވަނީ ޓްރަސްޓެންގް މޯލްޑިވްސް ޕްރައިވެޓް ލިމިޓެޑާ އެވެ.

ނަމަވެސް އެ މަސައްކަތް މިހާތަނަށް ފެށިފައެއް ނުވެ އެވެ. ބިނާރާ، ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން މިއަދު ބުނީ ބިން ހަވާލުކޮށްދޭން އެދި ހަތަރު ފަހަރެއްގެ މަތީން ސިޓީ ކައުންސިލަށް ސިޓީ ފޮނުވާފައިވާ ކަމަށެވެ.

އެގޮތުން ފުރަތަމަ ސިޓީ ފޮނުވީ މާޗް 29 ވަނަ ދުވަހު އެވެ. އަދި ފައިނޭންސް ހަމަޖެހުމާއެކު ބިމަށް ވަނުމުގެ ހުއްދައަށް އެދި އޭޕްރީލް 11 ވަނަ ދުވަހު ކޮންޓްރެކްޓަރު ސިޓީ ފޮނުވާފައިވާ ކަމަށެވެ. މީގެ އިތުރުން އޭޕްރީލް  12 ވަނަ ދުވަހާއި މެއި ތިންވަނަ ވަނަ ދުވަހުވެސް ބިން ހަވާލުކޮށްދޭން އެދި ސިޓީ ފޮނުވާފައިވެ އެވެ.

މިހާރު ވަނީ ހަތަރުވަނަ ސިޓީއެއް ވެސް ފޮނުވާފަ އެވެ. އެ ސިޓީގައި އެދިފައިވަނީ މޭ 31 ގެ ކުރިން ބިން ހަވާލުކުރުމަށެވެ. 

އެ ވުޒާރާއިން ބުނީ ދެ މަސް ދުވަސްވެގެންދިޔައިރު ހަތަރު ފަހަރެއްގެ މަތީން ސިޓީ ފޮނުވައިގެން ވެސް މަޝްރޫޢު ކުރިއަށް ގެންދިއުމަށް ބިން ހަވާލުކޮށްފައިނުވާ ކަމަށެވެ. އަދި މަޝްރޫއު ނުފެށި އޮތް ހަމައެކަނި ސަބަބަކީ އެއީ ކަމުގައި ފާހަގަކޮށްފައިވެ އެވެ.

މާލޭ ވެޓް މާކެޓް ކޮމްޕްލެކްސް ނިމުމުން ހުންނާނެ ގޮތް --

ބިނާރާ، ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން ބުނި ގޮތުގައި މި އިމާރާތުގެ ގްރަންޑް ފްލޯގައި މަސް މާރުކޭޓެއް ތަރައްގީ ކުރާނެ އެވެ. އަދި ދެވަނަ ފްލޯ އާއި ތިންވަަ ފްލޯގައި ތަރުކާރީ މާރުކޭޓެއް ތަރައްގީ ކުރާއިރު ހަތަރުވަނަ ފްލޯ ހާއްސަ ކުރާނީ ފުޑް ކޯޓްތަކަށެވެ.

މި މަސައްކަތް އެ ކުންފުންޏާއި ހަވާލުކޮށްފައި ވަނީ 126,359,594.94 އަށެވެ. މި މަޝްރޫއު ކުރިއަށް އޮތް 600 ދުވަސް ތެރޭގައި ނިންމަން ޖެހެ އެވެ.

މަޝްރޫއު ނުފެށި ލަސްވުމަކީ މަޝްރޫއުގެ އަގުބޮޑުވެ އެކަމަށް ކުރަންޖެހޭ ހޭދަ އިތުރުވާނެ ކަމެއްކަން ވެސް އެ ވުޒާރާއިން ވަނީ ފާހަގަކޮށްފަ އެވެ.