ކޮންގްރެސްގެ ހުއްދައަކާ ނުލައި, އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް ކުރަމުންދާ ހަނގުރާމަ ހުއްޓުވުމަށް ހުށަހެޅި ޤަރާރެއްގެ މައްސަލަ ކުރިއަށް ގެންދިޔުމަށް އެމެރިކާގެ ސެނެޓުން ފާސްކޮށްފިއެވެ.

މިއީ އެމެރިކާ އާއި އިސްރާއީލުގެ ސިފައިން ގުޅިގެން އީރާނަށް ޙަމަލާދޭން ފެށިތާ 80 ދުވަސް ވެފައިވާއިރު، އަންގާރަ ދުވަހު އެމެރިކާގެ ސެނެޓުން މި ގަރާރު ފާސްވީ 50 ވޯޓު ލިބިގެންނެވެ. މި ޤަރާރާ ދެކޮޅަށް 47 މެންބަރަކު ވޯޓު ދިނެވެ.

ވެރިކަން ކުރާ ރިޕަބްލިކަން ޕާޓީގެ ހަތަރު މެންބަރަކު ވަނީ ޕާޓީގެ ނިންމުމާ ޚިލާފަށް، އިދިކޮޅު ޑިމޮކްރެޓުންނާ ގުޅިގެން މި ޤަރާރަށް ތާއީދު ކޮށްފައެވެ. އޭގެ ތެރޭގައި ސެނެޓަރ ރޭންޑް ޕޯލް، ސޫޒަން ކޮލިންސް، ލީސާ މުރްކޯވްސްކީ އަދި ބިލް ކެސިޑީ ހިމެނެއެވެ. ޑިމޮކްރެޓިކް ޕާޓީގެ މެންބަރުންގެ ތެރެއިން މި ޤަރާރާ ދެކޮޅަށް ވޯޓު ދިނީ ހަމައެކަނި ސެނެޓަރ ޖޯން ފެޓަރމަންއެވެ.

މި ނިންމުމަކީ ޤާނޫނުއަސާސީގައިވާ ގޮތުގެ މަތިން، ހަނގުރާމައަށް ސިފައިން ފޮނުވުމުގެ ބާރު އޮންނަންވާނީ ރައީސަށް ނޫން ކަމަށާއި އެއީ ކޮންގްރެސްގެ ބާރެއް ކަމަށް ބުނެ ވަކާލާތު ކުރާ މެންބަރުންނަށް ލިބުނު ބޮޑު ކާމިޔާބީއެކެވެ. ނަމަވެސް، މި ޤަރާރު ތަންފީޒުވުމަށް އަދި ގިނަ ހުރަސްތަކެއް އެބަހުއްޓެވެ.

ސެނެޓުން މި ޤަރާރު ފާސްވިޔަސް، ރިޕަބްލިކަން ޕާޓީގެ މެޖޯރިޓީ އޮންނަ ހައުސް އޮފް ރެޕްރެޒެންޓެޓިވްސްއިން މިއަށް ރުހުން ދޭންޖެހެއެވެ. އަދި ރައީސް ޓްރަމްޕް މި ޤަރާރު ވީޓޯ ކުރާނެ ކަމަށް ބެލެވޭއިރު، އެ ވީޓޯ ބާތިލުކުރުމަށް ދެ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތު ބޭނުންވާނެއެވެ.

މި ޤަރާރު ހުށަހެޅި ޑިމޮކްރެޓިކް ސެނެޓަރ ޓިމް ކޭން ބުނީ، ފެބްރުއަރީ 28 ގައި ފެށުނު ހަނގުރާމަ ނިންމުމަށް އީރާނުން އާ ހުށަހެޅުންތަކެއް ހުށަހަޅާފައިވާ ކަމަށް ރައީސް ބުނެފައިވާތީ، މިއީ ކޮންގްރެސްއާ މަޝްވަރާ ކުރުމަށް ލިބޭ ރަނގަޅު ފުރުޞަތެއް ކަމަށެވެ. ނަމަވެސް ރައީސް ގެންދަނީ ސުލްޙައިގެ ހުށަހެޅުންތައް ކޮންގްރެސްއާ ހިއްސާކުރުމެއް ނެތި ބޮލާލައިޖަހަމުން ކަމަށް އޭނާ ތުހުމަތު ކުރިއެވެ.

1973 ވަނަ އަހަރު ފާސްކޮށްފައިވާ "ވޯ ޕަވަރސް އެކްޓް" ގެ ދަށުން، ކޮންގްރެސްގެ ހުއްދައާ ނުލައި ރައީސަށް އަސްކަރީ ޙަރަކާތްތައް ކުރިއަށް ގެންދެވޭނީ ގިނަވެގެން 60 ދުވަހަށެވެ. އެ މުއްދަތު ހަމަވުމުން ކޮންގްރެސްގެ ހުއްދަ ހޯދަންޖެހެއެވެ. އީރާނު ހަނގުރާމައަށް ދިން 60 ދުވަހުގެ މުއްދަތު މޭ މަހުގެ 1 ވަނަ ދުވަހަށް ވަނީ ހަމަވެފައެވެ.

ރައީސް ޓްރަމްޕް މޭ 1 ގައި ބުނެފައިވަނީ އީރާނާއެކު އޮތް ދެކޮޅުވެރިކަން "ސީޒްފަޔަރ" އަކާއެކު ނިމިފައިވާ ކަމަށެވެ. ނަމަވެސް، އޭގެ ފަހުންވެސް އެމެރިކާއިން ދަނީ އީރާނުގެ ބަނދަރުތައް ބްލޮކްކޮށް، އުޅަނދުތަކަށް ޙަމަލާދެމުންނެވެ. އަދި އީރާނުންވެސް ދަނީ ހޯރްމޫޒް ކަނޑުއޮޅި ބަންދުކޮށް، އެމެރިކާގެ އުޅަނދުތަކަށް ޙަމަލާދެމުންނެވެ.

ވައިޓް ހައުސްއާއި ރިޕަބްލިކަން މެންބަރުން ދިފާޢުގައި ބުނެފައިވަނީ ރައީސްގެ މި ޢަމަލުތަކަކީ އެމެރިކާގެ ސަލާމަތަށްޓަކައި ޤާނޫނީ އިމުގެ ތެރެއިން ކުރާ ކަންކަން ކަމަށެވެ. އަދި ޑިމޮކްރެޓުން މިފަދަ ޤަރާރުތައް ހުށަހަޅަނީ ސިޔާސީ ބޭނުމެއްގައި ކަމަށްވެސް އެމީހުން ތުހުމަތު ކުރެއެވެ.