ކުރިއަށް އޮތް އެމްޑީޕީގެ ޗެއާޕާސަން އިންތިހާބަކީ ކުރީގެ ރައީސް މުހައްމަދު ނަޝީދު ވާދަކުރައްވަންވީ އިންތިހާބެއް ކަމަށް ދެކެވަޑައިނުގަންނަވާ ކަމަށާ މިއީ އެމްޑީޕީގެ ލީޑާޝިޕުން ޒުވާނުންނަށް ފުރުސަތު ދޭންވީ ވަގުތު ކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
ސޯލިހް މިހެން ވިދާޅުވީ އެމަނިކުފާނުގެ އުފަންރަށް -- ޅ. ހިންނަވަރުގައި މިރޭ ބޭއްވީ މީކާއީލްގެ "އިތުބާރު" ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. ރައީސް ސޯލިހް ވިދާޅުވީ މިއީ އައު ލީޑަރުންނަށް ފުރުސަތު ދޭންވީ ވަގުތު ކަމަށާ ޕާޓީގައި 17 ޕަސެންޓް މެންބަރުންނަކީ ޒުވާނުން ކަމަށްވީއިރު މިއީ ޒުވާނުންނަށް އިސްކަން ދޭންވީ ވަގުތު ކަމަށެވެ.
އެހެން ނުވެއްޖެނަމަ މި ގަައުމަށް ދިމާވީ ހާލަތު އެމްޑީޕީއަށް ވެސް ކުރިމަތިވާނެ ކަމަށް ވިދާޅުވި އެވެ. ރައީސް ސޯލިހް ވަނީ މިއީ ނަޝީދު ވާދަކުރައްވަންވީ އިންތިހާބެއް ކަމަށް ދެކެވަޑައިނުގަންނަވާ ކަމަށް ވިދާޅުވެފަ އެވެ. ވިދާޅުވީ އެއީ ރައީސް ނަޝީދަށް ދެރަކޮށް ވިދާޅުވާ ވާހަކައެއް ނޫން ކަމަށެވެ. އެމަނިކުފާނު ކުރައްވަން ޖެހިވަޑައިގަންނަވާ މާ މުހިންމު މަސައްކަތް އެބަހުރި ކަމަށް ވިދާޅުވެ ވަރަށް ތައުރީފު ކުރެއްވި އެވެ.
އަދި އެމަނިކުފާނު ވިދާޅުވި ބަސްފުޅު އޮޅުވާލައްވާ ނުހެއްދެވުމަށާއި ބައިބައިވުމަށް ފުރުސަތު ނުދެއްވުމަށް އިލްތިމާސް ކުރެެއްވި އެވެ. ތަކުރާރުކޮށް ވިދާޅުވީ މިއީ އެމްޑީޕީގެ ލީޑާޝިޕަށް އައު ބަޔަކު ގެނެސް ޕާޓީގެ ކުރީގެ އިސް ބޭފުޅުންގެ ތަޖުރިބާއާއެކު ގައުމަށް ހެޔޮ ބަދަލުތަކެއް ގެނައުމަށް މަސައްކަތް ކުރަންވީ ވަގުތު ކަަމަށެވެ.
"އަޅުގަނޑު ގަބޫލުކުރާ ގޮތުގައި މިއީކީ ރައީސް ނަޝީދު ވާދަކުރަންވަންވީ އިންތިހާބެއް ނޫން. މިއީ އެމަނިކުފާނު އަޅުގަނޑުމެންނާއެކު މި ޤައުމު އިސްލާޙު ކުރުމަށްޓަކައި ޔުނައިޓެޑް ޑިމޮކްރެޓިކް ފްރަންޓްގައި އަޅުގަނޑުމެން ތިން ރައީސުން މިފެށި މަސައްކަތުގައި ދެމިހުންނަވަންވީ [ވަގުތު],"
ހިންނަވަރުގައި ހުންނަވާ މީކާއީލް އެންޑޯސްކުރެއްވުން
ރައީސް ސޯލިހް ވިދާޅުވީ ޗެއާޕަސަން އިންތިހާބުގައި އެމަނިކުފާނުގެ ފުރިހަމަ ތާއީދު އޮތީ މީކާއީލަށް ކަމަށެވެ. އަދި މީކާއީލް އެންޑޯސްކުރެއްވުމަށް އެންމެ މުނާސަބީ ހިންނަވަރުގެ ފަސްގަނޑުގައި ހުންނަވާ ކަމުގައި ވިދާޅުވި އެވެ.
މީކާއީލަށް ތާއީދު ކުރައްވަން ނިންމެވީ ސިޔާސީ ހަޔާތުން ލިބިވަޑައިގެންފައިވާ ތަޖުރިބާއާ އެމްޑީޕީގައި ހޭދަކުރި 21 އަހަރުގެ ލިބިވަޑައިގެންފައިވާ ތަޖުރިބާއިން އެއީ ކުރަން ޖެހޭނެ ކަމެއް ކަމަށް ގަބޫލުކުރެވޭތީ ކަމުގައި ވިދާޅުވި އެވެ.
Advertisement
This content is created and paid for by advertisers and does not involve Voice Journalists
