ވައިގަދަވެ، ކަނޑުތައްވެސް ގަދަވާނެ ކަމަށް ލަފާކޮށް ނ އިން އދ އަތޮޅަށް ރީނދޫ ސަމާލު ނެރެފިއެވެ.

މިއީ މުޅި ރާއްޖެއަށް ވެސް ވަރަށް މޫސުން ގޯސް ދުވަސްވަރެކެވެ. ޚާއްސަކޮށް ނ އިން އދ އަށް މިއަދު ހެނދުނު 6:30 10:30 އަށް މޫސުން ވަރަށް ގޯސްވާނެ ކަމަށް މެޓް އޮފީހުން ވަނީ ލަފާކޮށްފައެވެ.

އެ ސަރަހައްދަށް އެވަގުތު ތަކުގައި ރީނދޫ ސަމާލު ނެރެފައިވާއިރު މެޓް އޮފީހުން ބުނީ، އެވަގުތުތަކުގައި ބޯކޮށްވާރޭވެހި ގުގުރާނެ ކަމަށެވެ. އަދި ވައުގަދަވެފައި ކަނޑުތައްވެސް ގަދަވާނެ ކަމަށެވެ. 

މިއަދުގެ މޫސުން ލަފާކޮށް މެޓް އޮފީހުން ބުނީ އުތުރާއި މެދުރާއްޖޭގެ އެކި ހިސާބުތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށެވެ. އަދި ވިލާގަނޑުގައި 40 މޭލަށް ވައިގަދަވާނެ ކަމަށާ، ކަނޑުތައްވެސް ގަދަވާނެ ކަމަށް ލަފާކުރެވޭ ކަމަށެވެ. 

މީގެ އިތުރުން ރާޅުގެ އުސްމިންވެސް 4 ފޫޓާއި 7 ފޫޓާ ހަމައަށް އަރާނެ ކަމަށް ލަފާކުރެއެވެ. 

ރާއްޖެއަށް މިހާރު ކުރަމުން މިދަނީ ހުޅަނގު މޫސުމުގެ ވިއްސާރައެވެ. މެޓް އޮފީހުން ލަފާކޮށްފައި ވާގޮތުން ކުރިއަށް އޮތް ސުކޫލް ބަންދާއި ޢީދު ޗުއްޓީ ހިމެނޭހެން މި މެއި މަހު އެއްކޮށްވެސް މޫސުން ވަރަށް ގޯސްވާނެއެވެ. 

އެހެންކަމުން ، މޫސުމަށް ބަލައި އެންމެ ފަހުގެ މައުލޫމާތު ހޯދައިގެން ނޫނީ ކަނޑުމައްޗަށް ނޭރުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ. މީގެ އިތުރުން ވާރޭވެހި ފެން ބޮޑުވެދާނެތީވެ އެކަމަށް ސަމާލުވުމަށްވެސް ވަނީ އިލްތިމާސްކޮށްފައެވެ.