މެދުރާއްޖެތެރޭގެ ރަށްތަކަށް މޫސުން ވަރަށް ގޯސްވާނެ ކަމަށް ލަފާކޮށް ރީނދޫ ސަމާލުގެ ވަގުތު ދަންމާލައިފިއެވެ. 

މެޓް އޮފީހުން މިއަދު ހެނދުނު ވަނީ ނ އިން އދ އަތޮޅަށް ރީނދޫ ސަމާލު ނެރެފައެވެ. 10:30 އާ ހަމައަށް ސަމާލު ނެރެފައިވާއިރު، އެ އޮފީހުން މިހާރު ވަނީ އެ ސަމާލުގެ މުއްދަތު 15:00 އާ ހަމައަށް ދަންމާލާފައެވެ. 

އެގޮތުން ރީނދޫ ސަމާލު ދަންމާލާފައިވަނީ ބ އަތޮޅުން އއ އަތޮޅަށެވެ.

މެޓް އޮފީހުން ބުނީ، އެވަގުތުތަކުގައި 25 މޭލާ 30 މޭލާ ދެމެދުގެ ބާރު މިނުގައި ވައިޖެހި ވިލާގަނޑުގައި ގަޑިއަކު 45 މޭލަށްވައި ގަދަވާނެ ކަމަށް ލަފާކުރެވޭ ކަމަށެވެ. 

އަދި ކަނޑުތައްވެސް ވަރަށް ގަދަވާނެ ކަމަށް ވަނީ ލަފާކޮށްފައެވެ. 

މީގެ އިތުރުން މެޓް އޮފީހުން ވަނީ 11:00 އިން 3:00 އަށް ހއ އިން ވ އަތޮޅަށް ހުދު ސަމާލުވެސް ނެރެފައެވެ.

މިއަދުގެ މޫސުން ލަފާކޮށް މެޓް އޮފީހުން ބުނީ އުތުރާއި މެދުރާއްޖޭގެ އެކި ހިސާބުތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށެވެ. އަދި ވިލާގަނޑުގައި 40 މޭލަށް ވައިގަދަވާނެ ކަމަށާ، ކަނޑުތައްވެސް ގަދަވާނެ ކަމަށް ލަފާކުރެވޭ ކަމަށެވެ. 

މީގެ އިތުރުން ރާޅުގެ އުސްމިންވެސް 4 ފޫޓާއި 7 ފޫޓާ ހަމައަށް އަރާނެ ކަމަށް ލަފާކުރެއެވެ. 

ރާއްޖެއަށް މިހާރު ކުރަމުން މިދަނީ ހުޅަނގު މޫސުމުގެ ވިއްސާރައެވެ. މެޓް އޮފީހުން ލަފާކޮށްފައި ވާގޮތުން ކުރިއަށް އޮތް ސުކޫލް ބަންދާއި ޢީދު ޗުއްޓީ ހިމެނޭހެން މި މެއި މަހު އެއްކޮށްވެސް މޫސުން ވަރަށް ގޯސްވާނެއެވެ. 

އެހެންކަމުން ، މޫސުމަށް ބަލައި އެންމެ ފަހުގެ މައުލޫމާތު ހޯދައިގެން ނޫނީ ކަނޑުމައްޗަށް ނޭރުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ. މީގެ އިތުރުން ވާރޭވެހި ފެން ބޮޑުވެދާނެތީވެ އެކަމަށް ސަމާލުވުމަށްވެސް ވަނީ އިލްތިމާސްކޮށްފައެވެ.