މި އަހަރުގެ މެއި މަހުގެ 14 ވަނަ ދުވަހުގެ ނިޔަލަށް ދައުލަތުގެ އާމްދަނީއަށް ބޮޑު ކުރިއެރުމެއް ލިބި، ބަޖެޓުން 118.2 މިލިއަން ރުފިޔާގެ ސާޕްލަސްއެއް ވަނީ ރެކޯޑުކުރެވިފައެވެ.

ފިނޭންސް މިނިސްޓްރީގެ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، 14 މެއިގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި ޖުމްލަ 16.8 ބިލިއަން ރުފިޔާ ވަނީ ލިބިފައެވެ. މިއީ 2025 ވަނަ އަހަރުގެ އެ މުއްދަތުގައި ލިބުނު 14.9 ބިލިއަން ރުފިޔާއާ އަޅާބަލާއިރު 1.8 ބިލިއަން ރުފިޔާ ނުވަތަ 12.2 އިންސައްތައިގެ ކުރިއެރުމެކެވެ.

އާމްދަނީ އިތުރުވުމުގެ އެންމެ ބޮޑު ހިއްސާއެއް ވަނީ ޓެކްސް އާމްދަނީއަށެވެ. އެގޮތުން ޓެކްސްގެ ގޮތުގައި 13.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 17.1 އިންސައްތަ އިތުރު އަދަދެކެވެ. ހާއްސަކޮށް ކޯޕަރޭޓް އިންކަމް ޓެކްސްގެ ގޮތުގައި ލިބުނު އާމްދަނީ 31.3 އިންސައްތަ އިތުރުވެ، 2.7 ބިލިއަން ރުފިޔާއަށް އަރާފައިވާކަން ރިޕޯޓުން ފާހަގަކުރެވެއެވެ.

ދައުލަތުގެ ޖުމްލަ ޚަރަދުތަކަށް ބަލާއިރު، މި މުއްދަތުގައި 16.7 ބިލިއަން ރުފިޔާ ވަނީ ހޭދަވެފައެވެ. މިއީ 2025 ވަނަ އަހަރުގެ އެ މުއްދަތާ އަޅާބަލާއިރު 22.4 އިންސައްތައިގެ އިތުރުވުމެކެވެ. މީގެ ތެރެއިން ރިކަރަންޓް ޚަރަދު 14.7 ބިލިއަން ރުފިޔާއަށް އަރާފައިވާއިރު، ކެޕިޓަލް ޚަރަދު ވަނީ 2.0 ބިލިއަން ރުފިޔާއަށް އިތުރުވެފައެވެ.

ޚަރަދުތައް އިތުރުވި މައިގަނޑު ސަބަބުތަކުގެ ތެރޭގައި މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލުމުން، ތެލުގެ ސަބްސިޑީއަށް ކުރި ހޭދަ ބޮޑުވުން ހިމެނެއެވެ. ސަބްސިޑީއަށް ކުރި ޚަރަދު ވަނީ 2.3 ބިލިއަން ރުފިޔާއަށް އިތުރުވެފައެވެ. މީގެ އިތުރުން، ސަރުކާރުން މުސާރަތައް އެއްހަމަކުރުމަށް ކުރާ މަސައްކަތުގެ ދަށުން މުސާރައާއި އިނާޔަތްތަކަށް ކުރި ޚަރަދު 5.3 ބިލިއަން ރުފިޔާއަށް ވަނީ އިތުރުވެފައެވެ.

މިދިޔަ އަހަރާ އަޅާބަލާއިރު ޚަރަދުތައް އިތުރުވި ނަމަވެސް، ޓެކްސްގެ ގޮތުގައި ލިބޭ އާމްދަނީ އިތުރުވުމުގެ ސަބަބުން ދައުލަތުގެ މާލީ ހާލަތު ވަނީ ވަރުގަދަވެފައެވެ. މިގޮތުން ލިބުނު އާމްދަނީ ހޭދަވި ޖުމްލަ ޚަރަދަށްވުރެ އިތުރުވުމަކީ ބަޖެޓުގެ ސާޕްލަސް ދެމެހެއްޓުމަށް ލިބުނު ބޮޑު ބާރެކެވެ. ދަރަނި އަދާކުރުމާއި އިންޓަރެސްޓްގެ ޚަރަދުތައް 2.1 ބިލިއަން ރުފިޔާގައި ހިފެހެއްޓިފައިވާކަންވެސް ފިނޭންސް މިނިސްޓްރީގެ ރިޕޯޓުގައި ފާހަގަކޮށްފައިވެއެވެ.