އަދަދުގެ ލީވާން އަލީ ނަސީރު ޖަލަށް ލާން ކްރިމިނަލް ކޯޓުން ހުކުމް ތަންފީޒުކޮށް ނިމުމުން އޭނާ މިނިވަންވެއްޖެއެވެ.

ލީވާން އާއި އަދަދު ނޫހުގެ ނޫސްވެރިޔާ މުހައްމަދު ޝަހުޒާން ކޯޓުން ނެރުނު އަމުރާއި ހިލާފުވި ކަމަށް ކަނޑައަޅައި ޖަލަށް ލާފައިވަނީ މިމަހު 12 ވަނަ ދުވަހުއެވެ. 

އެގޮތުން ޝަހުޒާން 15 ދުވަހަށް ޖަލަށްލާން ވަނީ ހުކުމްކޮށްފަ އެވެ. އަދި ލީވާން 10 ދުވަހަށް ޖަލަށްލާން ހުކުމްކޮށްފައިވެ އެވެ. ލީވާންގެ ބަންދު މުއްދަތު ހަމަވުމުން އޭނާ ވަނީ މިއަދު މިނިވަންވެފައެވެ. ޝަހުޒާން އަދިވެސް ހުރީ ޖަލުގައެވެ. 

ޝަހުޒާނަށް ތުހުމަތު އޮތީ ރައީސުލްޖުމްހޫރިއްޔާގެ ފަރާތުން ބޭއްވެވި ނޫސްވެރީންގެ ބައްދަލްވުމުގައި އެ އަމުރާއި ހިލާފަށް ވާހަކަ ދެއްކުމުންނެވެ. ލީވާނަށް އޮތީ އެ އަމުރާއި ހިލާފަށް ހަބަރެއް ލިޔުމުގެ ތުހުމަތެވެ.

ކޯޓުން ވަނީ ކޯޓްގެ ހުރުމަތް ކެނޑިކަން ސާބިތުވާ ކަމަށް ކަނޑައަޅާ ޝަހްޒާން 15 ދުވަހަށް ޖަލަށް ލުމަށާއި 25,000 ރުފިޔާއިން ޖޫރިމަނާ ކޮށްފަ އެވެ.

އަދި ލީވާން 10 ދުވަހަށް ޖަލަށްލައި 25,000 ރުފިޔާއިން ޖޫރިމަނާ ކޮށްފައިވެ އެވެ.

އަދަދުން ހެދި ޑޮކިއުމަންޓްރީއަކާއި ގުޅިގެން ތަހުގީގެއް ހިންގާ އެ ނޫހުގެ އިސް ދެ ވެރީން ކަމަށްވާ ހުސައިން ފިޔާޒްއާ ހަސަން މުހައްމަދުގެ މައްޗަށް ވަނީ ދައުވާ އުފުލާފަ އެވެ.