ރައީސުލްޖުމްހޫރިއްޔާގެ އޮފީހާއި، މުލީއާގެއާއި ހިލާލީގޭގައި ދިގު މުއްދަތެއްގައި މަސައްކަތް ކޮށްފައިވާ ވ.ކަނި، އާދަމް ޢަލީ ނިޔާވެއްޖެ އެވެ.
އާދަމް އަލީ ނިޔާވީ ސްރީލަންކާގަ އެވެ. ޖަނާޒާ އޮތީ ލަންކާގެ ޖާވަތާ ޖުމާ މަސްޖިދުގައި މިއަދު އަސުރު ނަމާދަށް ފަހު އެވެ.
އާދަމް ނިޔާވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ތައުޒިޔާ ވިދާޅުވެފަ އެވެ. އެމަނިކުފާނުގެ ތައުޒިޔާގެ މެސެޖުގައި ވިދާޅުވީ އާދަމް އަލީ އަކީ ރައީސުލްޖުމްހޫރިއްޔާގެ އޮފީހާއި، މުލީއާގެ އާއި ހިލާލީގޭގައި ދިގު މުއްދަތެއްގައި މަސައްކަތް ކުރައްވައިފައިވާ، ވަފާތެރިކަމާއެކު ވަޒީފާގެ ވާޖިބުތައް އަދާކުރެއްވި ބޭފުޅެއް ކަމަށެވެ.
އަދި އޭނާއަކީ ޚިދުމަތް ކުރެއްވި ކޮންމެ ރައީސެއް އަދި ނައިބު ރައީސެއްގެ ލޯބި ވެސް ހޯއްދެވި ހަރުދަނާ ޝަޚްޞިއްޔަތެއް ކަމަށެވެ.
ދައުލަތަށް ޚިދުމަތްކުރެއްވުމުގެ އިނާމު ހާސިލުކުރެއްވި، 44 އަހަރަށްވުރެ ދިގު މުއްދަތުގެ މި ޚިދުމަތްތެރިޔާ ނިޔާވުމުގެ ހިތާމައިގައި، އެ ޢާއިލާއަށް އަދި އެކުގައި ވަޒީފާ އަދާކުރެއްވި ހުރިހާ ބޭފުޅުންނަށް ތަޢުޒިޔާ ދަންނަވާ ކަމުގައި ރައީސްގެ މެސެޖުގައި ވިދާޅުވެފައިވެ އެވެ.
ރައީސްގެ މެސެޖުގައި ވަނީ މަރްޙޫމް އާދަމް ޢަލީއަށް ސުވަރުގޭގެ ދާއިމީ ނިޢުމަތް ދެއްވުމާއި މާތްﷲގެ ތަނަވަސް ރަޙްމަތާއި ނިޢުމަތުގައި ތާއަބަދު ލެހެއްޓެވުން އެދި ދުއާ ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
