ކުރިއަށްއޮތް ދިވެހި ވަޠަނީ ޚިދުމަތުގެ ޕްރޮގްރާމްގެ ދެވަނަ ބެޗްގައި 75 ޒުވާނުން ފެނިގެންދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ދިވެހި ވަތަނީ ހިދުމަތުގެ ޕްރޮގްރާމް ފުރިހަމަކޮށް ދަސްވެނިވުނު ރަސްމިއްޔާތު މިއަދު ކުރިއަށްގެންގޮސްފައިވާއިރު މިކަމާ ގުޅޭގޮތުން އެކްސްގައި ކުރި ޕޯސްޓުގައި ރައީސް ޑރ.މުއިއްޒު ވަނީ މި ޕްރޮގްރާމް ފުރިހަމަކުރި ދަރިވަރުންނަށް މަރުހަބާ ވިދާޅުވެފައެވެ. މިއަދު ވަނީ 63 ޒުވާނުން ދަަސްވެނިވިފައެވެ. މީގެ ތެރޭގައި ހިމެނެނީ، 17 އަހަރުގެ 37 ޒުވާނުންނާއި، 18 އަހަރުގެ 24 ޒުވާނުން އަދި 19 އަހަރުގެ 2 ޒުވާނުންނެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ދިވެހި ވަޠަނީ ޚިދުމަތުގެ ފަންނީ ތަމްރީނަކީ، ދިވެހި ވަޠަނީ ޚިދުމަތުގެ ޕްރޮގްރާމްގެ އިނީޝިއަލް ޓްރެއިނިންގ ފުރިހަމަކުރާ ދަރިވަރުންނަށް އަމާޒުކޮށްގެން ކުރިއަށް ގެންދެވޭ ޕްރޮގްރާމެއްކަމަށެވެ. މި ޕްރޮގްރާމްގެ ދެވަނަ ބެޗު އިތުރު 75 ޒުވާނުންނާއެކު އަންނަ ޖޫންމަހުގެ އެއްވަނަ ދުވަހު ފެށިގެންދާނޭކަމަށެވެ.

މިއަދު ދަސްވެނިވުނު ދަރިވަރުންނަކީ، މިދިޔަ އަހަރުގެ ޑިސެމްބަރު 28 ވަނަ ދުވަހު ދަސްވެނިވި ދިވެހި ވަޠަނީ ޚިދުމަތުގެ ޕްރޮގްރާމްގެ އިނީޝިއަލް ޓްރެއިނިންގގެ ފުރަތަމަ ބެޗުގެ ދަރިވަރުންނަށް ހުޅުވާލި ފުރުޞަތުގައި ތަމްރީނަށް ޝައުޤުވެރިކަން ފާޅުކުރި ދަރިވަރުންނެވެ. ޖުމްލަ 4 މަސް ދުވަހުގެ މި ތަމްރީނު ހިންގާފައިވަނީ މިއަހަރުގެ ޖެނުއަރީމަހުގެ 15 ވަނަ ދުވަހުން ފެށިގެން އެމްއެންޑީއެފް ސްކޫލް އޮފް އިންޖިނިއަރިންގ އެންޑް ލޮޖިސްޓިކްސް ގައެވެ.