ކުރިއަށް އޮތް ބަރަކާތްތެރި އަޟުހާ ޢީދު ފާހަގަކުރުމަށް ދަނގެތީގައި ކުރިއަށް ގެންދާ މުބާރާތްތަކުގެ ތެރެއިން އަންހެން ކަނބަލުންނަށް ޚާއްސަކޮށް ބާއްވާ ކެއްކުމުގެ މުބާރާތް، ”ރަނިރަހަ“ގައި ބައިވެރިވުމުގެ ފުރުސަތު ހުޅުވާލައިފިއެވެ.

ޢީދުއުފާ އިމުގެ ތެރޭގައި ފާހަގަކުރުމަށް ދަނގެތީ ޖަމިއްޔަތުލް ޤަލަމުން އިސްނަގައިގެން، އެރަށު މުވައްސަސާތަކާއި، މަދަނީ ޖަމިއްޔާ ތަކާއި ގުޅިގެން ގިނަ ހަރަކާތްތަކަކާއި މުބާރާތްތަކެއް ބޭއްވުމަށް ވަނީ ނިންމާފައެވެ.

އެގޮތުން، މި އަހަރުގެ ކުޅިވަރުތައް ހިންގުމުގައި، އެ ރަށު ޖަމިއްޔަތުލް އަންވާރު، ދަނގެތީ ސިއްހީ މަރުކަޒު، ދަނގެތީ މަސައްކަތްތެރިންގެ ޖަމިއްޔާ، އަންހެނުންގެ ތަރައްގީއަށް މަަސައްކަތްކުރާ ކޮމިޓީ، ދަނގެތި ޕޮލިސް ސްޓޭޝަން، ދަނގެތީ ޔޫތު ސެންޓަރު، ދަނގެތީ ސްޓެލްކޯ އަދި އަލް އަސްރު ބައިވެރިވެއެވެ.

މިދިޔަ އަހަރުގެ ރަނިރަހަ މުބާރާތުގައި ބައިވެރިވި ޓީމްތައް ކައްކަނީ: ފޮޓޯ/ ޖަމިއްޔަތުލް ޤަލަމް 

މިފަހަރު ބާއްވާ މުބާރާތްތަކުގައި ބައިވެރިވުމުގެ ފުރުސަތު މިހާރު ހުޅުވާލާފައިވާއިރު، އަންހެން ކަނބަލުންގެ މެދުގައި އެންމެ ފޯރިގަދަ އެއް މުބާރާތަކީ ކެއްކުމުގެ މުބާރާތެވެ. 

މި މުބާރާތުގައި ބައިވެރިވެވޭނީ ތިން މީހުންގެ ޓީމަކުންނެވެ. އަދި ބައިވެރިންނަށް ހަވާލުކުރެވޭ ބާވަތްތައް ކަނޑައެޅިފައިވާ ވަގުތުގައި ކައްކައި ނިންމައި، ކެއްކި ތަކެތި ރީތިގޮތަކަށް ޑެކޮރޭޓްވެސް ކުރަންޖެހެއެވެ. ޓީމުތަކުން ތައްޔާރުކުރާ ތަކެއްޗަށް މާކްސްދެނީ ކަމުގެ ތަޖުރިބާކާރު ބޭފުޅުންނެވެ. 

މިދިޔަ އަހަރުގެ ރަނިރަހަ މުބާރާތުގެ ތެރެއިން- ފޮޓޯ/ ޖަމިއްޔަތުލް ޤަލަމް 

އެންމެ މަތީމާކްސް ހޯދައިގެން އެއްވަނަ އަށް އަންނަ ޓީމަކަށް 5000 ރުފިޔާގެ ފައިސާގެ އިނާމް، ދެވަނަ ޓީމަށް 3000 ރުފިޔާގެ އިނާމް އަދި ތިންވަނަ ޓީމަށް 1000 ރުފިޔާގެ ފައިސާގެ އިނާމް ދިނުމަށް ވަނީ ނިންމާފައެވެ.  

މިދިޔަ އަހަރުގެ ރަނިރަހަ މުބާރާތުގައި ޓީމަކުން ތައްޔާރުކުރި ޑިޝްއެއް- ފޮޓޯ/ ޖަމިއްޔަތުލް ޤަލަމް

މި މުބާރާތުގެ އިތުރުން، ޒުވާނުންގެ ވާދެމުގެ މުބާރާތަކާއި، ބޮޑެތި މީހުންގެ ވާދެމުގެ މުބާރާތެއްގެ އިތުރުން މަސްރޭހެއް އަދި އެންމެ ބުންވަރު ހުރި މީހެއް ބެލުމަށް ގަދަފަހުލަވާނު މުބާރާތެއް ބޭއްވުމަށްވެސް ވަނީ ނިންމާފައެވެ. އެ މުބާރާތްތަކުގައި ވާދަކުރުމުގެ ފުރުސަތު މިހާރު ވަނީ ހުޅުވާލާފައެވެ. 

ކޮންމެ މުބާރާތަކުންވެސް ވަނަވަނައަށް އަންނަ ފަރާތްތަކަށް ފައިސާގެ އިނާމް ދިނުމަށް ވަނީ ނިންމާފައެވެ.

މުބާރާތްތަކުގައި ބައިވެރިވުމަށް އަންނަނިވި ލިންކުތައް މެދުވެރިކޮށް ފޯމު ފުރުމުން ބައިވެރިވެވޭވެނެ ކަމަށް ޖަމިއްޔަތުން ޤަލަމުން ބުނެއެވެ. 

ރަނިރަހަ މުބާރާތް: https://forms.gle/cUFhyT3v5MyoZv1F8

ގަދަ ފަހުލަވާނު: https://forms.gle/WqfGrtYaQME5SKvV8

ޒުވާނުންގެ ވާދެމުން މުބާރާތް: 

https://forms.gle/KeCPpkG4Tn1JqgSG9

ބޮޑެތި މީހުންގެ ވާދެމުން މުބާރާތް: 

https://forms.gle/XKDw5ZvKzcGPT3n39

މަސްރޭސް:

https://forms.gle/NZSg4NDLVMRKFdnXA

ޢީދަށް ދަނގެއްޗަށް ޒިޔާރަތްކުރާ މެހެމާނުންނަށްވެސް މުބަރާތްތަކުގައި ބައިވެރިވެވޭނެ ކަމަށް ޖަމިއްޔަތުލް ޤަލަމުން ބުނެއެވެ. 

އިސްލާމީ ހަމަތަކާއި، އިމުގެ ތެރޭގައި، ދިވެހި ސަގާފަތާ، އާދަކާދަތަކާ އެއްގޮތަށް، އެންމެން ގުޅިގެން، ބައިވެރިކުރުވައިގެން ދަނގެތީގައި ކުރިއަށް ގެންދާ މި ހަރަކާތްތަކުގެ މެއިން ސްޕޮންސަރަކީ ބީއެމްއެލް އިސްލާމިކްއެވެ. މީޑިއާ ޕާޓްނަރަކީ ވޮއިސް އެވެ.