އިންޑިއާގެ ވެރިކަންކުރާ ޕާޓީއަށް މަލާމާތްކުރުމުގެ ގޮތުން އުފައްދާފައިވާ ސިޔާސީ ހަރަކާތެއް ކަމަށްވާ "ކޮކްރޯޗް ޖަންތާ ޕާޓީ" (ސީޖޭޕީ) ގެ ރަސްމީ ވެބްސައިޓް އިންޑިއާ ސަރުކާރުން ބަންދުކޮށްފައިވާ ކަމަށް އެ ހަރަކާތް އުފެއްދި ފަރާތުން ތުހުމަތުކޮށްފިއެވެ.

މި ހަރަކާތް އުފެއްދި، ބޮސްޓަން ޔުނިވަރސިޓީގައި ކިޔަވަމުންދާ އަބީޖީތު ދިޕްކޭ ހޮނިހިރު ދުވަހު އެކްސްގައި ބުނީ، އެ ޖަމިއްޔާގެ "އައިކޮނިކް" ވެބްސައިޓް ސަރުކާރުން ހުއްޓުވާފައިވާ ކަމަށެވެ. އަދި އޭނާގެ އަމިއްލަ އިންސްޓަގްރާމް އެކައުންޓާއި ސީޖޭޕީގެ އިންސްޓަގްރާމް އެކައުންޓް ވެސް ހެކްކޮށްފައިވާ ކަމަށް އޭނާ ބުންޏެވެ. 

ނަމަވެސް މިހާރު ވަނީ އެ ވެބްސައިޓްތަކާއި އެކައުންޓްތައް އަންބްލޮކް ކޮށް ވަދެވޭގޮތް ހަދާފައެވެ.

މި ހަރަކާތް ދިޕްކޭ ފެށީ މީގެ ހަފުތާއެއް ކުރިން، އިންޑިއާގެ ޗީފް ޖަސްޓިސް ސޫރިޔާ ކާންތު ދެއްކެވި ވާހަކައާ ގުޅިގެންނެވެ. ޖަސްޓިސް ކާންތު ވަނީ ވަޒީފާނެތް ޒުވާނުންނަކީ "ކޮކްރޯޗް" ނުވަތަ ކުރަތްޕާ އެއްފަދަ ބައެއް ކަމަށް ސިފަކުރައްވާފައެވެ. ނަމަވެސް ފަހުން އޭނާ ވަނީ އެއީ ފޭކު ސެޓުފިކެޓު ހޯދާ މީހުންނަށް ނިސްބަތްކުރެއްވި ބަހެއް ކަމަށް ވިދާޅުވެ އެކަން ސާފުކޮށްދެއްވާފައެވެ.

"ކޮކްރޯޗް ޖަންތާ ޕާޓީ" ނުވަތަ ސީޖޭޕީގެ ނަން ނިސްބަތްކޮށްފައިވަނީ އިންޑިއާގެ ބޮޑުވަޒީރު ނަރެންދުރަ މޯދީގެ ބާރަތިޔާ ޖަންތާ ޕާޓީ (ބީޖޭޕީ) އަށެވެ. އުފެދުނުތާ އެންމެ ހަފުތާއެއްގެ ތެރޭގައި ސީޖޭޕީގެ އިންސްޓަގްރާމް ފޮލޯވަރުންގެ އަދަދު 22 މިލިއަނަށް އަރާފައިވާއިރު، އިންޑިޔާގެ އެންމެ ބޮޑު ސިޔާސީ ޕާޓީ ކަމަށްވާ ބީޖޭޕީގެ އިންސްޓަގްރާމްގައި ތިބީ 9 މިލިއަން ފޮލޯވަރުންނެވެ.

ދިޕްކޭ ބުނި ގޮތުގައި ފާއިތުވި ހަފުތާގައި އެއް މިލިއަން މީހުން މި ހަރަކާތާ ގުޅިފައިވެއެވެ. މި ހަރަކާތުން މިހާރު ކެމްޕޭން ކުރަމުންދަނީ އިންޑިއާގެ އެޑިއުކޭޝަން މިނިސްޓަރު ދަރުމެންދުރާ ޕްރަދާން އިސްތިއުފާ ދިނުމަށެވެ. މެޑިކަލް އެންޓްރަންސް އިމްތިހާނުގެ ކަރުދާސްތައް ލީކުވި މައްސަލައިގައި މިނިސްޓަރުގެ އިސްތިއުފާއަށް ގޮވާލާ ސީޖޭޕީން ތައްޔާރުކުރި ޕެޓިޝަނެއްގައި 6 ލައްކަ މީހުން ވަނީ ސޮއިކޮށްފައެވެ.

މި ހަރަކާތުގެ މަގްސަދާ ގުޅޭގޮތުން އަލްޖަޒީރާއާ ވާހަކަދައްކަމުން ދިޕްކޭ ބުނީ، ވެރިކަމުގައި ތިބި މީހުން ގަބޫލުކުރަނީ ރައްޔިތުންނަކީ ކުރަފި ނުވަތަ ސޫފިތަކެއް ކަމަށެވެ.

"އެމީހުން ދަންނަންޖެހޭނެ ކުރަފި އާލާވަނީ ކުނިވެފައިވާ ތަންތަނުގައިކަން. މިއަދު އިންޑިއާގެ ހާލަތަކީ އެއީ،" އޭނާ ބުންޏެވެ.