ވ. އަތޮޅު އަލިމަތާ ކައިރީ ކަނޑުގެ"ޝާކް ކޭވް" އަށް ޑައިވް ކުރަން އުޅުނު އިޓަލީގެ ފަސް ފަތުރުވެރިން މަރުވި ހާދިސާ ފެންމަތިވެފައިވަނިކޮށް، މީގެ 40 އަހަރު ކުރިން، އެތަނަށް ޑައިވް ކުރަން ގޮސް އުޅުމުގެ ތެރޭގައި މަރުވި އިޓަލީގެ އަންހެނެއްގެ ފިރިމީހާ، އަންހެނުން ނިޔާވި ހިތާމަވެރި ހާދިސާގެ ހަނދާންތައް އާކޮށްފިއެވެ.

ޖިއޯޖިއޯ ބެޓިންގެ އަންހެނުން، އަދި ކަނޑުއަޑީގެ ފޮޓޯގްރާފަރެއް ކަމަށްވާ އަނާ މާރިއާ ޕިސްޓޮލާޓޯ މަރުވީ 11 ޖެނުއަރީ 1983 ގައެވެ. އެ ދެމަފިރިން ރާއްޖެއަށް އައީ ކައިވެންޏަށްފަހު ހަނީމޫން ހޭދަކުރުމަށެވެ. ބެޓިން ކިޔައިދިން ގޮތުގައި އޭނާގެ އަންހެނުން ޑައިވް ކުރަން ކުރިން ހަމަޖެހިފައި އޮތީ 65 ފޫޓު އަޑިއަށެވެ. ނަމަވެސް، ޑައިވް ގައިޑްގެ ނިންމުމާއެކު އޭނާ ވަނީ 175 ފޫޓަށްވުރެ އަޑިއަށް ގެންގޮސްފައެވެ.

ބެޓިން ބުނި ގޮތުގައި އެއީ ކުރު ޑައިވްއަކަށް ވާނެ ކަމަށް އޭނާ އުއްމީދު ކުރި ނަމަވެސް، އޭނާގެ އަންހެނުން އެނބުރި މައްޗަކަށް ނައެވެ. އަނާގެ ހަށިގަނޑު ފެނުނީ ގެއްލުނުތާ 20 ދުވަސް ފަހުން، ވަރަށް ބޮޑަށް ކުނިވެފައި އޮއްވައެވެ. ރާއްޖޭގައި މުނިފޫހިފިލުވުމަށް ކުރާ ޑައިވްތަކުގެ އެންމެ ފުން މިނަކީ 100 ފޫޓު ކަމަށްވާއިރު، ގައިޑްގެ އެ ނިންމުމަކީ އެއްވެސް ސަބަބެއް ނެތި ނިންމި ނުރައްކާތެރި ނިންމުމެއްކަން ބެޓިން ފާހަގަކުރިއެވެ.

މި ހާދިސާގެ ވާހަކަ ބެޓިން ދައްކާފައިވަނީ މިދިޔަ މެއި މަހުގެ 14 ވަނަ ދުވަހު ވ. އަތޮޅުގެ ހޮހަޅައަކަށް ޑައިވް ކުރަން އުޅުނު އިޓަލީގެ ފަސް މީހުން މަރުވި ހާދިސާ ރޯމްގެ ތަހުގީގީ އިދާރާތަކުން ބަލަމުންދާ ދަނޑިވަޅެއްގައެވެ. އެ ހާދިސާގައި މަރުވި މީހުން 160 ފޫޓު އަޑިއަށް ގޮސްފައިވަނީ ބޭނުންވާ ތަމްރީނާއި، ހުއްދަ އަދި އެކަށީގެންވާ ސާމާނު ނެތި ކަމަށް ތަހުގީގަށް ވަނީ އެނގިފައެވެ.

ބެޓިން އާއި އޭނާގެ އަންހެނުން 

މި ހާދިސާއާ ގުޅިގެން ފިންލޭންޑްގެ ޑައިވަރުން ބުނާ ގޮތުގައި، އެހާ ފުން މިނެއްގައި އާދައިގެ އޮކްސިޖަން ޓޭންކު ބޭނުންކޮށްގެން ދެމިތިބެވޭނީ އެންމެ 10 މިނެޓެވެ. އެ ފުންމިނަށް ބޭނުންވަނީ ނައިޓްރޯޖަން އަދި ހީލިއަމް ހިމެނޭ "ޓްރައިމިކްސް" ގޭސް މިކްސްޗަރެކެވެ. އިޓަލީގެ ޓުއާ އޮޕަރޭޓަރުން ބުނެފައިވަނީ އެ ފުންމިނަށް ޑައިވް ކުރުމުގެ ހުއްދަ ދީފައި ނުވާނެ ކަމަށެވެ.

ބެޓިންގެ އަންހެނުންގެ މަރުގެ ބަދަލެއްގެ ގޮތުގައި ފައިސާ ދިން ނަމަވެސް، އެއީ އޭނާއަށް އެއްވެސް ބޭނުންތެރި އެއްޗެއް ނޫން ކަމަށް ބެޓިން ބުންޏެވެ. އަދި އެ ދުވަހަށްފަހު ދުވަހަކުވެސް ޑައިވް ކޮށްފައި ނުވާނެ ކަމަށް އޭނާ ބުންޏެވެ. އަދި އޭނާގެ އަންހެނުން ގެއްލިގެން ހޯދަމުން ދަނިކޮށް، ކަމާބެހޭ ފަރާތްތަކުން އޭނާ އަވަހަށް އިޓަލީއަށް ފޮނުވާލަން މަސައްކަތް ކުރި ގޮތާމެދުވެސް ބެޓިން ވަނީ ހިތްހަމަނުޖެހުން ފާޅުކޮށްފައެވެ.

އޭނާ ބުނި ގޮތުގައި، އަނާ ހޯދުމުގެ މަސައްކަތް ކުރިއަށް ދަނިކޮށް، ޖެހިގެން އައި ދުވަހު އޭނާ އިޓަލީއަށް ފޮނުވާލުމަށްޓަކައި ފްލައިޓް ޓިކެޓް ހަމަޖައްސައި، އޭނާ ރާއްޖެއިން ފުރަން ބާރުއެޅި ގޮތަކީ މިއަދުވެސް ހިތުން ފިލައިގެން ނުދާ ހިތްދަތި ހަނދާނެކެވެ.

މީގެ 40 އަހަރު ކުރިން ހިނގި މި ހާދިސާއާއި ދާދިފަހުން ހިނގި ހާދިސާއާ ހުރި އެއްގޮތްކަން ބެޓިން ފާހަގަކުރިއެވެ. ދެ ހާދިސާގައިވެސް ފަތުރުވެރިން ވަނީ ކަނޑުގެ ގަވާއިދުތަކާ ހިލާފަށް، އެކަށީގެންވާ ސާމާނާއި ތަމްރީނު ނެތި ނުރައްކާތެރި ފުންމިނަކަށް ގެންގޮސްފައެވެ. އަދި މިފަދަ ހާދިސާތަކަށްފަހު މަރުވި މީހުންގެ އާއިލާތަކާ މެދު އަމަލުކުރާ ގޮތާމެދު އޭނާ ވަނީ ކަންބޮޑުވުން ފާޅުކޮށްފައެވެ.

މި ހާދިސާތަކާ ގުޅިގެން އިޓަލީގެ ކަމާބެހޭ އިދާރާތަކުން ދަނީ ވ. އަތޮޅުގައި ފަސް މީހުން މަރުވި މައްސަލަ ޖިނާއީ ތަހުގީގެއްގެ ތަހުގީގު ކުރަމުންނެވެ.