މި ގައުމުގައި އެންމެ ބުރަކޮށް މަސައްކަތްކޮށް، އެންމެ ބޮޑު ޒިންމާއެއް އުފުލާ ޓީޗަރުންނާއި ނަރުހުންގެ މުސާރަ، ދައުލަތުގެ ތިން ބާރުގެ އިސްވެރިން ފިޔަވައި އެހެން ހުރިހާ ދާއިރާއަކަށް ވުރެ ބޮޑުވާން ޖެހޭނެ ކަމަށް ކުރީގެ ވަޒީރު ރާޝިދާ ޔޫސުފް ވިދާޅުވެއްޖެއެވެ.

ރާޝިދާގެ ފޭސްބުކް ޕޭޖުގައި ކުރެއްވި ޕޯސްޓެއްގައި ވިދާޅުވީ، ރާއްޖޭގައި އެންމެ ގިނަ ވަގުތު، އެންމެ ބުރަކޮށް، އަދި އެހާމެ ޒިންމާދާރުކަން ބޮޑު މަސައްކަތެއް ކުރަނީ ޓީޗަރުންނާއި ނަރުހުން ކަމަށެވެ.

މީހުންގެ ފުރާނައާ ސީދާ ގުޅިފައިވާ މި މަސައްކަތްތަކަކީ ޝުކުރުގެ ބަހެއް މަދު ފަހަރަކު ނޫނީ ނުލިބޭ ވަޒީފާތަކެއްކަން އޭނާ ފާހަގަކުރެއްވިއެވެ.

ޚާއްޞަކޮށް ޓީޗަރުންނަކީ ތަފާތު އެތައް މަސްއޫލިއްޔަތުތަކެއް ކޮނޑުގައި އަޅައިގެން ތިބޭ ބައެއްކަން ފާހަގަކުރައްވައި، ރާޝިދާ ވިދާޅުވީ ދައުލަތުގެ ތިން ބާރުގެ އިސްވެރިން، ރައީސުލްޖުމްހޫރިއްޔާ، މަޖިލީހުގެ ރައީސް އަދި އުއްތަމަ ފަނޑިޔާރު، ޖެހިގެން އެންމެ ބޮޑު މުސާރައެއް ލިބޭ ބަޔަކަށް ވާންޖެހޭނީ އެމީހުން ކަމަށެވެ. 

”ފެންނަމުންދަނީ ވަރަށް ބޭއިންސާފު ފިޔަވަޅުތަކެއް އަޅާތަން“ ރާޝިދާ ވިދާޅުވިއެވެ.

ރާޝިދާ މިފަދަ މޭރުމަކުން ވާހަކަދައްކަވާފައި މިވަނީ، މިދިޔަ ބުރާސްފަތި ދުވަހު ނެޝަނަލް ޕޭ ކޮމިޝަނުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ (ޑަބްލިއުޑީސީ) ރައީސާއިންގެ މުސާރަ ދެގުނައަށް ބޮޑުކުރަން ނިންމުމާ ގުޅިގެންނެވެ.

ޕޭ ކޮމިޝަނުން ފުރަތަމަ ނިންމީ ސިޓީތަކުގެ ޑަބްލިއުޑީސީ ރައީސާއިންނަށް 41,000 ރުފިޔާގެ މުސާރައެއް ދިނުމަށެވެ. އަދި ރަށްރަށުގެ އަންހެނުންގެ ކޮމިޓީތަކުގެ ރައީސާއިންނަށް 21,000 ރުފިޔާ ދޭން ނިންމިއެވެ. ނަމަވެސް، އެ ނިންމުމާއެކު އާންމުންގެ ބޮޑެތި ފާޑުކިޔުންތަކެއް އަމާޒުވާން ފެށުމުން، ސިޓީތަކުގެ ރައީސާއިންގެ މުސާރަ 21,000 ރުފިޔާއަށް އަދި ރަށު ކައުންސިލްތަކުގެ އަންހެނުންގެ ކޮމިޓީތަކުގެ ރައީސާއިންގެ މުސާރަ 17,000 ރުފިޔާއަށް މިހާރު ވަނީ ކުޑަކޮށްފައެވެ.