ރައްޔިތުން އެއްބައިވަންތަވެގެން ކުރެވޭ މަސައްކަތްތަކުގައި ރ.މީދޫ އަކީ އަބަދުވެސް ފާހަގަކޮށްލެވޭ ރަށެކެވެ. އިޖުތިމާއީގޮތުން އެހެން ރަށަކަށް އެހީވުމަށް ނުވަތަ ރަށު ފެންވަރުގައި ކުރެވޭ ކަންކަމުގައިވެސް މީދޫ ރައްޔިތުންނަކީ ވަރަށް ތަފާތު ބައެކެވެ. އެކަން މީގެ ކުރިން ހިނގާފައިވާ ކަންތައްތަކަށް ބަލާލުމުން ވަރަށް ރަނގަޅަށް އެނގި ހާމަވެއެވެ. އެގޮތުން މިފަހުން އެއްބައިވަންތަކަމުގެ ދުވަސް ފާހަގަކުރުމަށް މީދޫގެ ގިނަ އަދަދެއްގެ ރައްޔިތުން ދޯނިތަކުގައި ތުޅާދޫއަށް ކުރި ދަތުރުވެސް ފާހަގަކޮށްލެވެއެވެ. 

މީދޫ ރައްޔިތުން މިހާރު އަވަދިނެތި އެ އުޅެނީ މިފަހަރުގެ އަޟްހާ ޢީދު ފާހަގަކުރުމަށް ތައްޔާރުވުމުގައެވެ. އީދަށް މުޅި ރަށް ޒީނަތްތެރިކޮށްފައިވާއިރު، ރޭގަނޑު މުޅި ރަށް ދިއްލާލުމަށް މަގުތަކުގައި ވަނީ ލައިޓްތައް ހަރުކޮށްފައެވެ. މި ލައިޓްތަކުން މީދޫ ރައްޔިތުންގެ ހުނަރުވެރިކަން ފެނިގެންދާނެއެވެ. 

މީދޫ ދިއްލާލާފައި..

ޢީދު ފާހަގަކުރުމުގެ ގޮތުން އެންމެ ފުރަތަމަ ހަރަކާތް މީދޫގައި ފަށާފައިވަނީ ރޭ ކުރިއަށްގެންދިޔަ ހާއްސަ ބާބެކިއު ހަރަކާތާއެކުގައެވެ. 

މީދޫ އިރުމަތި އަވަށުން ނެރެފައިވާ އީދު ހަރަކާތްތަކުގެ ތާވަލަށް ބަލާއިރު، މިމަހުގެ 30 ވަނަ ދުވަހުގެ ނިޔަލަށް އީދު ހަރަކާތްތައް ކުރިއަށްދާނެއެވެ. ރޭ ބޭއްވި ބާބެކިއުއަށްފަހު މިއަދަށް ތާވަލްކޮށްފައިވަނީ، އީދު ވެދުމާ ދިއުމުގެ ހަރަކާތެވެ. 

ރޭ ބޭއްވި ބާބެކިއު ހަރަކާތް..

މީދޫ އީދު ހަރަކާތް

މީދޫގައި މިފަހަރު އީދު އުފާގެ ހަރަކާތްތައް ކުރިއަށްގެންދަނީ އިހުގައި އެރަށުގައި އީދު ކުޅިވަރުތައް ކުޅޭ ގޮތަށެވެ. މިއީ އަދުގެ ޒުވާނުންނަށް އިހުގައި އީދު ކުޅިވަރުތައް ކުޅެ އުޅޭގޮތް ބަލާލުމަށް ލިބިގެންދާނޭ ވަރަށް ރަނގަޅު ފުރުސަތަކަށްވާނެއެވެ. 

މިފަހަރު މީދޫގައި ކުރިއަށްގެންދާ އީދު އުފާގެ ހަރަކާތްތައް ހާއްސަވާ އެހެންކަމެއްވެސް އަދި އެބައޮތެވެ. ވިސިޓް މޯލްޑިވްސްއިން ދަނީ މީދޫގައި ކުރިއަށްގެންދާ އީދު ހަރަކާތްތައް މުޅި ދުނިޔެއަށް ދައްކާލުމަށް ހާއްސަ ކަވަރޭޖަކަށް ތައްޔާރުވަމުންނެވެ. މިއީ ރާއްޖޭގެ މުއްސަނދި ސަގާފަތާއި ދިވެހިންގެ އަމިއްލަ އާދަކާދަ ބައިނަލްއަޤްވާމީ މުޖުތަމައުއަށް ދައްކާލުމުގެ ގޮތުން ވިސިޓް މޯލްޑިވްސްއިން ކުރިއަށްގެންދާ ކަމެކެވެ. ބޭނުމަކީ ހަމައެކަނި ފަތުރުވެރިކަމުގެ މަންޒިލެއްގެ ގޮތުގައި އިސްތިހާރުވުމުގެ އިތުރުން ރާއްޖޭގެ މުއްސަނދި ސަގާފަތާއި އާދަކާދަތައްވެސް އިސްތިހާރުކުރުންކަމަށް ވިޒިޓް މޯލްޑިވްސް ކޯޕަރޭޝަނުން ވަނީ ބުނެފައެވެ.

މީދޫގައި ކުލަގަދަ ގޮތެއްގައި ޢީދު ފާހަގަކުރުމަށް ތައްޔާރުވެފައިވާއިރު، އީދު އުފަލުގައި ބައިވެރިވުމަށް އެހެންރަށްރަށުން އެރަށަށް ގިނަ އަދަދެއްގެ މީހުން އަންނަމުންދާަކަމަށް މައުލޫމާތު ލިބެއެވެ.