އިންޑިއާގެ ޓެމިލް ނާޑޫގެ ކޮއިމްބަޓޯރުގައި އުމުރުން އެންމެ 10 އަހަރުގެ އަންހެން ކުއްޖަކަށް ޖިންސީ ގޯނާކޮށް، ރަހުމުކުޑަގޮތަކަށް މަރާލި ހާދިސާއާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި، ފުލުހުންގެ އިސް އޮފިސަރުންތަކެއް ހީ ސަމާސާކުރި މަންޒަރު ފެންނަ ވީޑިއޯއެއް އާންމުވުމާ ގުޅިގެން އާންމުންގެ ބޮޑު ނުރުހުމެއް ފުލުހުންނަށް އަމާޒުވެއްޖެއެވެ.
މި ހިތާމަވެރި ހާދިސާ ހިނގާފައިވަނީ ކޮއިމްބަޓޯރުގެ ސުލޫރު ސަރަހައްދުގައެވެ. ފުލުހުން މައުލޫމާތު ދޭ ގޮތުގައި، މިދިޔަ ބުރާސްފަތި ދުވަހުގެ ހަވީރު އެ ކުއްޖާ ގެއިން ބޭރަށް ނުކުތީ ކާބޯތަކެތި ގަތުމަށެވެ. އެ ވަގުތު ސައިކަލެއްގައި އައި ދެ މީހަކު އެ ކުއްޖާ ރަހީނުކޮށް، ޖިންސީ ގޯނާކުރުމަށްފަހު މަރާލާފައިވާ ކަމަށް ތަހުގީގަށް ވަނީ އެނގިފައެވެ. އެ ކުއްޖާގެ ހަށިގަނޑު ފެނިފައިވަނީ ހުކުރު ދުވަހު ކަންނަމްޕަލަޔަމް ފެންގަނޑު ކައިރިންނެވެ.
މި މައްސަލައާ ގުޅިގެން ފުލުހުން ވަނީ ކާތިކް ނަމަކަށް ކިޔާ މީހަކާއި އޭނާގެ އެހީތެރިއެއް ކަމަށްވާ މޯހަން ރާޖް ހައްޔަރުކޮށްފައެވެ. މީގެ ތެރެއިން ކާތިކް ހައްޔަރުކުރަން އުޅުމުގެ ތެރޭގައި އޭނާ ވަނީ އިމާރާތެއްގެ މަތިން ފުންމާލައި ފިލަން މަސައްކަތްކޮށްފައެވެ. އެ ހާދިސާގައި އޭނާގެ އަތާއި ފައި ބިންދައިގެން ގޮސްފައިވާ ކަމަށް ފުލުހުން ބުނެއެވެ.
މި ދެ މީހުންގެ މައްޗަށް މިހާރު ވަނީ އިންޑިއާގެ އާ ގާނޫނުލްއުގޫބާތާއި ކުޑަކުދިންނަށް ކުރާ ޖިންސީ ގޯނާއިން ރައްކާތެރިކޮށްދޭ ގާނޫނުގެ ދަށުން ދައުވާ އުފުލާފައެވެ.
އާންމުންގެ ބޮޑު ކަންބޮޑުވުމަކަށް ވެފައިވަނީ، މިހާ ނުރައްކާތެރި އަދި ހިތާމަވެރި މައްސަލައެއްގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ފުލުހުން އަމަލުކުރި ގޮތެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި، ވެސްޓް ޒޯންގެ އިންސްޕެކްޓަރ ޖެނެރަލް އޮފް ޕޮލިސް، އާރް.ވީ ރަމްޔާ ބާރަތީ އާއި އޭނާގެ ކައިރީގައި ތިބި އޮފިސަރުން ނޫސްވެރިންގެ ބައްދަލުވުމުގައި ތިބީ ވަރަށް މަޖާވެފައި ހީ ސަމާސާ ކުރާށެވެ.
މި މަންޒަރުތަކާ ގުޅިގެން ގިނަ ބަޔަކު ދަނީ ފާޑުކިޔަމުންނެވެ.
ކުޑަކުއްޖަކަށް މިފަދަ ބޮޑު އަނިޔާއެއް ލިބިފައިވާ ދަނޑިވަޅެއްގައި، މުޖުތަމައުގެ ރައްކާތެރިކަން ބަލަހައްޓަން ތިބި އިސް އޮފިސަރުންގެ ފަރާތުން މިފަދަ އަމަލެއް ފެނުމަކީ ބަލައިގަނެވޭނެ ކަމެއް ނޫން ކަމަށް އާންމުން ބުނެއެވެ.
ނަމަވެސް، މި ވީޑިއޯއާ ގުޅިގެން ޓެމިލް ނާޑޫ ފުލުހުން އަދި ރަސްމީކޮށް އެއްޗެއް ބުނެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
