ބަރަކާތްތެރި އަޟްޙާ ޢީދުގެ މުނާސަބަތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދިވެހި ރައްޔިތުންނަށް ތަހުނިޔާ ފޮނުއްވައި، ޢީދުގެ ކުޅިވަރުތަކާއި އުފާފާޅުކުރުންތަކުގައި އިސްލާމީ ރިވެތި އުސޫލުތަކާއި ދިވެހީންގެ ރީތި އާދަކާދަތަކުގައި ހިފެހެއްޓުމަށް އިލްތިމާސްކުރައްވައިފިއެވެ.
ޢީދު ދުވަހުގެ މުނާސަބަތުގައި ރައީސް މިއަދު ދެއްވި ޚިޠާބުގައި ރައީސުލްޖުމްހޫރިއްޔާ ވަނީ ބަރަކާތްތެރި އަޟްޙާ ޢީދުގެ ތަހުނިޔާ ރާއްޖޭގެ އެންމެހައި ރައްޔިތުންނަށާއި، މި އަހަރުގެ ޙައްޖުގެ މަތިވެރި އަޅުކަމުގައި ބައިވެރިވި ދިވެހި ޙައްޖުވެރިންނަށް އަދި މުޅި އިސްލާމީ އުންމަތަށް ރައްދުކުރައްވާފައެވެ.
ރައީސުލްޖުމްހޫރިއްޔާގެ ޚިޠާބުގައި އަޟްޙާ ޢީދަކީ މާތްالله ވަރަށް މުހިއްމު ޢިބްރަތްތަކަކާއި ޙިކުމަތްތަކެއް ލައްވާފައިވާ މުނާސަބަތެއްކަން ފާހަގަކުރެއްވިއެވެ. އެގޮތުން، މިއީ މުޅި މުސްލިމް އުންމަތް އެއް ސަފަކަށް ތަރުތީބުކޮށްދޭ، އޯގާތެރިކަމުގެ ނަމޫނާއެއްކަމަށް އެމަނިކުފާނު ވިދާޅުވިއެވެ. ޢަރަފާތު ބިމުގެ ހަމަހަމަކަމުން ފެށިގެން ފެތުރިގެންދާ މި އުފާވެރިކަމަކީ އިންސާނީ ކުލުނުގެ ރަމްޒެއްކަންވެސް ރައީސް ފާހަގަކުރެއްވިއެވެ.
މީގެ އިތުރުން، އުޟްޙިޔާ ކަތިލުމާއި، ހަދިޔާ ބަދަލުކުރުމާއި، ފަޤީރުންނަށް އެހީތެރިވުމަކީ މުޖުތަމަޢުގެ އިޖުތިމާޢީ ފޭރާން ބަދަހިކޮށްދޭ ކަންކަންކަމަށް ރައީސް ވިދާޅުވިއެވެ. އަދި މިއީ މަޢާފުކުރުމާއި، މައިންބަފައިންނާއި ގާތްތިމާގެ މީހުންނާއެކު ޢާއިލީ ގުޅުން ބަދަހިކުރުމަށް ލިބޭ ވަރަށް ފަހި ފުރުޞަތެއްކަމުގައި އެމަނިކުފާނު ސިފަކުރެއްވިއެވެ.
ރައީސް އިތުރަށް ވިދާޅުވީ، މުޖުތަމަޢުގެ ނިކަމެތިންނާއި އެކަނިވެރިންގެ ހިނިތުންވުމަކީ ތިމާގެވެސް އުފާކަމުގައި ދުށުމަށް މި ޢީދުން ދަސްކޮށްދޭ ކަމަށެވެ. އަދި ޢީދުގެ ސަބަބުން އާލާވާ އެއްބައިވަންތަކަމަކީ ޤައުމުގެ އަމާންކަމާއި ސުލްހަވެރިކަން ދެމެހެއްޓުމަށް ލިބޭ ބާރެއްކަމަށްވެސް ވިދާޅުވިއެވެ.
މިއާއެކު ރައީސުލްޖުމްހޫރިއްޔާ ވަނީ ޢީދުގެ ކުޅިވަރުތައް ކުރިއަށްގެންދާއިރު، އިސްލާމީ އުސޫލުތަކާ ޚިލާފު، ދިވެހީންގެ އާދަކާދަތަކާ ބީރައްޓެހި ކަންކަމުން ދުރުހެލިވުމަށް އިލްތިމާސްކުރައްވާފައެވެ.
ޢީދުގެ އެކިއެކި ކުޅިވަރުތައް ކުޅެ އުފާފާޅު ކުރައްވަމުން ގެންދަވާއިރު، އިސްލާމީ ރިވެތި އުސޫލުތަކުގައި ހިފަހައްޓަވައި، ދިވެހީންގެ ރީތި އާދަކާދަތަކާ ބީރައްޓެހި ކަންކަމުން ދުރުވެވަޑައިގަތުމަށް ރާއްޖޭގެ ލޮބުވެތި ރައްޔިތުންނަށް އަޅުގަނޑު އިލްތިމާސް ކުރަމެވެ.
ރައީސް މުޢިއްޒު
މެސެޖުތައް ނިންމަވާލައްވަމުން، ރައީސުލްޖުމްހޫރިއްޔާ ވަނީ، ޤައުމުތަކުގެ ލީޑަރުންނަށް، ދުޅަހެޔޮ ޞިއްހަތަކަށާއި ފާގަތިކަމަށް އެދިވަޑައިގެން، ހެޔޮއެދުންތައް ފޮނުއްވާފައެވެ. އަދި، މި މުނާސަބަތުގައި އެބޭފުޅުންނަށް، އިތުރު ކުރިއެރުމާއި، އުފާވެރިކަން މިންވަރު ކުރެއްވުމަށްވެސް އެމަނިކުފާނު އެދިވަޑައިގެންފައި ވެއެވެ.
Advertisement
This content is created and paid for by advertisers and does not involve Voice Journalists
