ހޮރްމުޒް ކަނޑުއޮޅި ބަންދުކުރުމަށް އެމެރިކާއިން އަޅާފައިވާ ފިޔަވަޅުތައް އުވާލާނެކަމަށް އެޤައުމުގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ. 

ޓްރަމްޕްގެ އަމިއްލަ ސޯޝަލް މީޑިއާ އެކައުންޓްގައި ކުރެއްވި ޕޯސްޓެއްގައި ވިދާޅުވެފައިވަނީ، އީރާނާ ދެކޮޅަށް ހޯރްމުޒް ކަނޑުއޮޅީގައި އަޅާފައިވާ ފިޔަވަލުތައް އުވާލުމަށް ނިންމާފައިވާކަމަށެވެ. މިކަން ކުރައްވާނީ އީރާނާއެކު ވެވޭ ހާއްސަ އެއްބަސްވުމެއްގެ ދަށުންކަމަށް ޓްރަމްޕް ފާހަގަކުރެއްވިއެވެ. އެގޮތުން މިކަމާ ގުޅޭގޮތުން ކުރިއަށްއޮތް ހޯމަދުވަހު މަޝްވަރާ ބައްދަލުވުންތައް ފެށުމަށް ނިންމާފައިވާކަމަށް ޓްރަމްޕް ވަނީ ވިދާޅުވެފައެވެ.

ހޮރްމުޒް ކަނޑުއޮޅީގައި އެމެރިކާއިން އަޅާފައިވާ ފިޔަވަޅުތައް އުވާލުމަށް ޓްރަމްޕްގެ ބައެއް ޝަރުތުތައްވެސް ވަނީ ހިއްސާކުރައްވާފައެވެ. މީގެ ތެރޭގައި އީރާނުން ނިއުކްލިއާ ހަތިޔާރު ހޯދަން ނޫޅުމާއި، ހޮރްމޫޒް ކަނޑުއޮޅި ދެކޮޅަށް ވެސް ދަތުރުފަތުރަށް ހުޅުވާލައި، ޓޯލް ފީއެއް ނެގުމެއް ނެތި ބޭނުންކުރެވޭނެ ގޮތް ހެދުން ހިމެނެއެވެ. މީގެ އިތުރުން އެ ކަނޑުއޮޅީގައި އީރާނުން ހަރުކޮށްފައި ހުރި ހުރިހާ މައިންތައް ނަގަން ޖެހޭނެ ކަމަށް ވެސް ޓްރަމްޕް ބުނެފައެވެ.

މީގެ އިތުރުން އެންމެ ހާއްސަ އެއް ޝަރުތަކީ، އީރާނުން ބިމު އަޑީގައި ވަޅުލާފައިވާ މުއްސަނދިކޮށްފައިވާ ޔޫރޭނިއަމް ހޯދައި ނައްތާލުމެވެ. މި ޝަރުތުތައް ފުރިހަމަ ކުރުމުން އީރާނުގެ ބަނދަރުތަކުގައި އެޅި ކަނޑުގެ ހިސާރު ނަގާނެ ކަމަށް ޓްރަމްޕް ވަނީ ޔަގީންކަން ދީފައެވެ.

ޓްރަމްޕް މިފަހަރު އާ ޝަރުތުތަކެއް ކަނޑައެޅިނަމަވެސް އީރާނުން އެންމެ ފަހުންވެސް ބުނެފައިވަނީ، އެމެރިކާ އާއެކު އެޤައުމުން އެއްބަސްވުމަކަށްދާން ބޭނުން ނުވާކަމަށެވެ. ސަބަބަކީ، އިތުބާރު ނެތުންކަމަށް އީރާނުން ވަނީ ބުނެފައެވެ. ނަމަވެސް ސުލްހައަކީ އީރާނުން އަބަދުވެސް އިސްކަންދޭ ކަމެއްކަމަށް އެޤައުމުގެ ސަރުކާރުން ވަނީ ބުނެފައެވެ.