ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ މިންވަރު ދަށްވެލާފައި އޮތުމަށްފަހު އިތުރުވާން ފަށައިފިއެވެ.

ޓޫރިޒަމް މިނިސްޓްރީން އެންމެފަހުން އާއްމުކުރި ތަފާސްހިސާބުތަކަށް ބަލާއިރު، މިމަހުގެ 21 ވަނަ ދުވަހުން ފެށިގެން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަނީ އިތުރުވާން ފަށާފައެވެ. 

މިހިނގާ މެއިމަހުގެ 21 ވަނަ ދުވަހުގެ ކުރިން ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ޖުމްލަ ގޮތެއްގައި ހުރީ ހަތަރު ހާހުން ދަށުގައެވެ. ނަމަވެސް މި ވޭތުވެދިޔަ 7 ދުވަހުގެ ތަފާސްހިސާބުތަކަށް ބަލާއިރު، މިހާރު ކޮންމެ ދުވަހަކު 5 ހާހަށްވުރެ ގިނަ ފަތުރުވެރިން ރާއްޖެއަށް ވަނީ ޒިޔާރަތްކޮށްފައެވެ.

ރާއްޖެއަށް ޒިޔާރަތްކުރަމުން އައި ފަތުރުވެރިންގެ އަދަދު ދަށަށްދާން ފެށީ އީރާން ހަނގުރާމައާ ގުޅިގެންނެވެ. ހަނގުރާމައިގެ ފުރަތަމަ މަހު ރާއްޖެ އަންނަ ބޮޑެތި ބައެއް ފްލައިޓްތައް މުޅިންހެން ކެންސަލްވެގެން ދިޔައިރު، މިއީ މި ފަހުގެ ތާރީހެއްގައި ރާއްޖޭގެ ޓޫރިޒަމަށް ކުރިމަތިވި އެންމެބޮޑު އެއް ގޮންޖެހުމެވެ. މެދުއިރުމަތީގެ މަޝްރަހު ހަމައަކަށް އެޅުމާއެކު އުދުހުންތައް މެދުކަނޑާލި ފްލައިޓްތައް އަލުން ފެށުމާއެކު ރާއްޖެއަށް ޒިޔާރަތްކުރަމުން އަންނަ ފަތުރުވެރިންގެ އަދަދު ވަނީ އިތުރުވާން ފަށާފައެވެ. 

މިހިނގާ މެއިމަހުގެ 27 ވަނަ ދުވަހުގެ ނިޔަލަށް ރާއްޖެއަށް 923,984 ފަތުރުވެރިން ވަނީ ޒިޔާރަތްކޮށްފައެވެ. މިދިޔަ އަހަރުގެ މި މުއްދަތުގެ ތެރޭގައި ޒިޔާރަތްކޮށްފައިވަނީ، 962,242 ފަތުރުވެރިންނެވެ.

ރާއްޖެ އަންނަ ފަތުރުވެރިންގެ އަދަދު ދަށަށްގޮސް ޓޫރިޒަމް ސިނާއަތުގެ ވިޔަފާރިއަށް 500 މިލިއަން ޑޮލަރަށް ވުރެ ބޮޑު ގެއްލުމަކާ ކުރިމަތިލާން ޖެހިފައިވާކަމަށް ދިވެހި ޓްރެވަލް އޭޖެންޓުންގެ ޖަމިއްޔާ މަޓާޓޯ އަދި ގެސްޓްހައުސްތައް ހިއްސާވާ ޖަމިއްޔާ އެންއެޗްޖީއޭއެމުން ވަނީ ބުނެފައެވެ.