ވިޔަފާރި ބަނދަރުގައި ކޮންޓެއިނާ ސްކޭންކުރާ ނިޒާމް ގާއިމްކޮށް ނިމުމުން ވިޔަފާރި ބަނދަރުން ވަގަށް ތަކެތި އެތެރެކުރުމުގެ މައްސަލައަށް ވަރަށްބޮޑު ހައްލެއް ލިބިގެންދާނޭކަމަށް ދާހިލީ ވަޒީރު އަލީ އިހްސާން ވިދާޅުވެއްޖެއެވެ.

މަނާތަކެތި އެތެރެކުރުން ހުއްޓުވުމަށް ބޯޑަރުތައް ބެލެހެއްޓުން ހަރުދަނާކުރުމަށް ފަށާފައިވާ މަސައްކަތްތަކުގެ ތެރެއިން މާލޭ ވިޔަފާރި ބަނދަރުން ބާލާ ކޮންޓެއިނާތައް ސްކޭން ކުރެވޭ ނިޒާމެއް ގާއިމްކުރުމުގެ މަސައްކަތް ވަނީ ފަށާފައެވެ. މިކަމާ ގުޅޭގޮތުން ދާހިލީ ވަޒީރު ވިދާޅުވީ، ރާއްޖެއަށް ތަކެތި އެތެރެކުރާ ދޮރޯށިތައް ބެލެހެއްޓުމަށް ކުރެވެމުންދާ ހާއްސަ މަސައްކަތްތަކާއެކު ވަގަށް އެތެރެކުރާ ތަކެތި އަތުލައިގަނެވޭ މިންވަރު އިތުރުވަމުންދާކަމަށެވެ. މިކަމުން ދައްކުވައިދެނީ ތަންފީޒީ އިދާރާތަކުން ކުރަމުންގެންދާ މަސައްކަތުގެ ނަތީޖާކަމަށްވެސް ވަޒީރު ފާހަގަކުރެއްވިއެވެ.

ވަޒީރު އިހްސާން ވިދާޅުވީ ކޮންޓެއިނާ ހުރިގޮތަށް ސްކޭންކުރެވޭނެ ނިޒާމެއް ގާއިމްކުރުމުގެ މަސައްކަތް ކަސްޓަމްސް އާއި އެމްޕީއެލް އާ ގުޅިގެން މަސައްކަތްކުރަމުން ގެންދާކަމަށެވެ. މި މަސައްކަތުގެ ދަށުން ވިޔަފާރި ބަނދަރުގައި ގާއިމްކުރެވޭ ސްކޭން މެޝިން އިންސްޓޯލްކުރުމުގެ މަސައްކަތް ކުރިއަށްއޮތް ހަތަރު މަސްދުވަހުގެ ތެރޭގައި ނިމޭނޭކަމަށް ވަޒީރު ވިދާޅުވިއެވެ.

ވިޔަފާރި ބަނދަރުގައި ކޮންޓެއިނާ ސްކޭން ކުރެވޭ ނިޒާމެއް ގާއިމްކުރުމުގެ މަސައްކަތް ކުރިއަށްދާއިރު، ކޮންޓެއިނާ ތަކުގެ ތެރޭގައި ފޮރުވައިގެން ސިނގިރޭޓް ފަދަ ތަކެތި އެތެރެކުރުމަކީ ރާއްޖޭގައި ވަރަށް އާއްމު ކަމެކެވެ. މޯލްޑިވްސް ކަސްޓަމްސް އާއި އެމްޕީއެލް ގުޅިގެން ކުރިއަށްގެންދާ ބައެއް އޮޕަރޭޝަންތަކުގައި ވަގަށް އެތެރެކުރާ ބައެއް އެއްޗެހި އަތުލައިގަންނަމުންދާއިރު، މީގެ ތެރޭގައި ސިނގިރޭޓްގެ ބާވަތްތައް ނިސްބަތުން ގިނަކަން ފާަހަގަކުރެވެއެވެ.