ގާނޫނަށް ބަދަލު ގެނެސް ރާއްޖެ އެތެރެކުރާ ސިނގިރޭޓަށް ނަގަމުން އައި ޑިއުޓީ ކުޑަކުރަން ދުނިޔޭގެ ސިއްހަތު ޖަމިއްޔާއިން ލަފާ ދީފައިވާ ކަމަށާ އެކަމާއި ގުޅިގެން ކަމާގުޅޭ އިދާރާތަކުން ވަރަށް ފުޅާ ދާއިރާއެއްގައި މަޝްވަރާ ކުރުމަށް ފަހު ގޮތްތަކެއް ނިންމާނެ ކަމަށް ސަރުކާރުން ބުނެފި އެވެ.
ސަރުކާރުން އެކަން ހާމަކުރީ ހަތަރު މިނިސްޓަރަކު ބައިވެރިވެވަޑައިގެން މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރީންގެ ބައްދަލްވުމުގަ އެވެ. އެ ބައްދަލްވުމުގައި ވާހަކަ ދައްކަވަމުން ހޯމް މިނިސްޓަރު އަލީ އިހްސާން ވިދާޅުވީ 2024 ވަނަ އަހަރު, ގާނޫނަށް ބަދަލު ގެނެސް ރާއްޖެ އެތެރެކުރާ ސިނގިރޭޓަށް ނަގަމުން އައި ޑިއުޓީ ބޮޑުކުރީ ވޭޕް މަނާކުރުމާއި ގުޅިގެން ގިނަ ބަޔަކު ސިނގިރޭޓް ބޭނުންކުރަން ކުރަން ފަށާފާނެ ކަމަށް ބެލެވޭތީ ދުންފަތުން ދިވެހި ޖީލު ސަލާމަތް ކުރުމަށް ކަމަށެވެ.
އެގޮތުން ސިނގިރޭޓުން އޭރު ނަގަމުން އައި ތިން ރުފިޔާ 30 ލާރީގެ ބަދަލުގައި އަށް ރުފިޔާއަށް ބޮޑުކުރަން ނިންމި އެވެ.
ނަމަވެސް އެއީ ވަގުތާއި ހަލާތަށް ބަދަލާ އަބަދުވެސް ބަދަލު ގެނައުމުގެ ވިސްނުން އޮތް ކަމެއް ކަން މިނިސްޓަރު އިހްސާން ފާހަގަ ކުރެއްވި އެވެ. އިހްސާން ވިދާޅުވީ ސިނގިރޭޓްގެ ޑިއުޓީ އެ މިންވަރަށް ބޮޑު ކުރުމަކީ އޭރު ސަރުކާރުން ނިންމި އުނދަގޫ ނިންމުމެއް ކަމަށެވެ.
އަދި ސިނގިރޭޓް ޑިއުޓީއާ ގުޅޭގޮތުން ޑަބްލިއުއެޗްއޯގެ ލަފައެއް ލިބިފައިވާ ކަމުގައި ވިދާޅުވި އެވެ.
"މި ވަގުތު އަޅުގަނޑުމެންނަށް ލިބިފައިވާ ދިރާސާތަކުން، ހާއްސަކޮށް ޑަބްލިއުއެޗްއޯއިން ހަދާފައިވާ ދިރާސާއަކުން ރާއްޖެއަށް 2026 ވަނަ އަހަރަށް ރިކޮމެންޑްކޮށްފައި އޮތް އެއް ޑިއުޓީ ރޭޓަކީ 4ރ. މިއީ އަޅުގަނޑުމެން ކޮންސިޑާ ކުރަމުން އަންނަ ރޭޓެއް މިހާރު ވެސް," އިހްސާން ވިދާޅުވި އެވެ.
އިހްސާން ވިދާޅުވި އެފަދަ ނިންމުމެއް ނިންމާނީ ވަރަށް ފުޅާ ދާއިރާއެއްގައި މަޝްވަރާ ކުރުމަށް ފަހު ކަމަށެވެ. އަދި އެފަދަ ނިންމުމެއް ނިންމާނަމަ ގާނޫނަށް ބަދަލު ގެނައުމަށް ހުށައަޅާނެ ކަމަށް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
