ނަމާދު ވަގުތު ޖެހުމުން، ވަކި ވަގުތެއް ވަންދެން ކުޅިވަރުކުޅުން މަނާކޮށް، ކުޅިވަރުކުޅޭ ތަންތަނުގައި ނަމާދު ކުރެވޭނެ އިންތިޒާމް ހަމަޖައްސަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް މުޢިއްޒު ވިދާޅުވީ، ދިވެހިންނަކީ މުސްލިމުން ކަމަށާ، ދިވެހިންގެ ދިރިއުޅުމުގައި ޢަމަލީ މައިދާނުގައިވެސް ދީނަށް އިސްކަންދޭންޖެހޭނެ ކަމަށެވެ.
މިސާލަކަށް ކުޅިވަރުގެ މައިދާނުގައި، އުޅޭއިރު ނަމާދުގަޑި ޖެހިގެން ނިމިގެންދާއިރުވެސް ކުޅިވަރު ކުޅުމުގައި ތިބުމަކީ އެންމެ ރަނގަޅު ގޮޔެއް ނޫން. (އެކަމަކު) އަޅުގަނޑުމެންގެ ތެރޭގައި ކަންކަން އޮންނަ ގޮތް އެއީ. އެއީ ގަސތުގައި ކުރާ ކަމެއްވެސް ނޫން. ޒަމާނުއްސުރެ އޮތް އާދަ.
ރައީސް މުޢިއްޒު
އެހެންކަމުން ކުރިއަށް އޮތް ތަނުގައި، ކުޅިވަރު ކުޅޭ ތަންތަނުގައި ނަމާދު ކުރެވޭނެ އިންތިޒާމް ހަމަޖައްސައި، ކުޅިވަރު ކުޅެން އުޅޭ ފަރާތްތައްވެސް ނަމާދު ވަގުތު ޖެހުމުން ނަމާދު ކުރެވޭނެ ގޮތް ހަދައުދެއްވާނެ ކަމަށް ރައީސް ވިދާޅުވުއެވެ.
އަޅުގަނޑުމެންގެ ތެރޭގައި މިހާރު މަޝްވަރާ ކުރެވެމުންގޮސް ވަކި ހިސާބަކަށް ގެންދެވިފައި ތަންފީޒު ކުރުމާ ހަމައަށް ގެންދެވިފައި މިއޮތީ ކުޅިވަރުގެ މައިދާނުގައި، މިސާލަކަށް ސަރުކާރުން އަޅާ އިމާރާތްތަކުގައި ސްޕޯޓްސް ކޮމްޕްލެކްސް ތަކާ ތަންތަނުގައި، ކުޅިވަރު އެކުވެނީގައިވެސް، ނަމާދު ކުރެވޭނެ ފެސިލީޓަށް ގާއިމް ކުރުން. އަދި ބަންގި ގޮވާ ގަޑިން ފެށިގެން، ކަނޑައެޅޭ ވަކިވަގުތަކަށް ހުރިހާ ކުޅިވަރުތަކެއް މެދުކަނޑާލެވޭ ގޮތަށް، (ވިއްސަކަށް މިނެޓް ނަމަވެސް) ގެންނަންޖެހޭ ބަދަލުތައް ގެންނާނަން
ރައީސް މުޢިއްޒު
ރައީސް ވިދާޅުވީ، މާފަންނު ސްޓޭޑިއަމް އާއި ކުޅިވަރުއެކުވެނި އާއި ދެންވެސް ސަރުކާރުން އަޅަން ނިންމާފައިވާ ހުރިހާ ކުޅިވަރު ކުޅޭ ތަނެއްގައި ނަމާދު ކުރުމަށް ޚާއްސަ ތަނެއް ހުންނާނެ ކަމަށެވެ.
ރައީސް ވިދާޅުވީ އެފަދަ ފިޔަވަޅުތައް އަޅަން ނިންމަވާފައިވަނީ ދިވެހި މުޖުތަމަޢުއަކީ ސައްތައިން ސައްތަ މުސްލިމު ގައުމަކަށް ވުމުން ކަމަށެވެ. އެހެންކަމުން މުޖުތަމައުގެ ކަންކަން ތަންފީޒުވާންޖެހޭނީ އެކަމުގެ މައްޗަށް ބިނާކޮށް ކަމަށްވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
