މި މަހުގެ ފަހުކޮޅުގައި ބެންކް އޮފް މޯލްޑިވްސްގެ ޑޮލަރު ލިމިޓަށް އެދެެވޭ ބޮޑު ލުޔެއް ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ބީއެމްއެލުން ކަނޑައަޅާފައި އޮތް ޑޮލަރުގެ ލިމިޓާއި ގުޅިގެން ނޫސްވެރިއަކު ކުރި ސުވާލަށް ޖަވާބުދެއްވަމުން ރައީސް ވިދާޅުވީ, ޑޮލަރު ލިމިޓްކޮށްފައިވަނީ ބީއެމްއެލްއަށް ދަތިތަކަކާ ކުރިމަތިވެފައިވާތީ ކަމަށެވެ.

ނަމަވެސް މިމަހު ފަހުކޮޅު، ޑޮލަރު ލިމިޓަށް ލުއިތަކެއް ލިބޭނެ ކަމުގެ އިޝާރާތެއް ބޭއްކުން ދީފައިވާ ކަމަށް އެމަނިކުފާނު ވިދާޅުވިއެވެ. 

"އިއްޔެގަ ބޭންކަށް ރައީސް އޮފީހުން މައުލޫމާތު ހޯދުމަށް ބެލިއިރުގަ، މިމަސް ނިމޭ ހިސާބުގައި އިރާދަކުރެއްވިއްޔާ އަނެއްކާވެސް ވަރަށް ބޮޑުތަނުން ލުއިކޮށްދޭނެ ކަމުގެ އިޝާރާތްކުރައްވާފަ އޮތީ." ރައީސް ވިދާޅުވިއެވެ.

ބީއެމްއެލްއިން މީގެ ކުރިން ބުނެފައިވާގޮތުން، ޑޮލަރު ލިމިޓަށް ބަދަލެއް ގެންނަން މަޖުބޫރުވީ މެދުއިރުމަތީގެ މަސްރަހަށް އައި ބަދަލުތަކާ ގުޅިގެން ރާއްޖެއަށް އަންނަ ފަތުރުވެރިންގެ އަދަދު މަދުވެ، ބޭންކަށް ގަންނަން ލިބޭ ބޭރު ފައިސާގެ މިންވަރު ދަށްވުމާ ގުޅިގެންނެވެ.

އަދި ބޭންކަށް ލިބޭ ޑޮލަރަށްވުރެ، ބޭރުވާ ޑޮލަރުގެ ނިސްބަތް އިތުރުވެ ޑޮލަރު ލިބުމުގައި ތާށިތަކެއް އުޅޭތީ ކަމަށެވެ.

އެހެންކަމުން ހަމަހަމަ ގޮތުގައި ޚިދުމަތް ފޯރުކޮށްދީ، ޒަރޫރީ ބޭނުންތަކަށް ބޭރު ފައިސާ އިގްތިސާދު ކުރުމަށް ފިޔަވަޅުތައް އެޅީ ކޮންމެހެން މަޖުބޫރުވެގެން ކަމަށް ބޭންކުން ބުނެފައިވެ އެވެ.