ޑައިމަންޑް ޖުބިލީ އިންޓަނޭޝަނަލް ފުޓުބޯޅަ މުބާރާތުގެ ދެވަނަ މެޗްގައި މިރޭ ދިވެހިރާއްޖެ އާއި އަފްޢާނިސްތާން ބައްދަލުކުރިމެޗް ހަނިގޮތަކަށް އަފްޢާނިސްތާނުން ކާމިޔާބުކޮށްފިއެވެ.

ގަލޮޅު ދަނޑުގައި ކުޅުނު މިމެޗް، އަފްޢާން ކާމިޔާބުކުރީ 1-0 ގެ ނަތީޖާއަކުންނެވެ. މެޗްގައި އަފްޢާން ޓީމުން ލަނޑު ޖަހާފައިވަނީ މެޗް ނިމެން 10 ވަރަކަށް މިނެޓަށް ވެފައިވަނިކޮށެވެ. މި ލަނޑު ކާމިޔާބުކޮށްދިނީ، ރޯމާން ފާޒީ އެވެ.

ރާއްޖެ ބަލިވިނަމަވެސް މެޗް ފެށުމާ ހަމައިން، މެޗްގެ އެންމެ ފަހު ވަގުތާހަމަޔަށްވެސް މޮޅަށް ކުޅެފައިވަނީ ރާއްޖޭގެ ޓީމުންނެވެ. އަފްޢާނިސްތާނުން ގުޅިގެން އުފެއްދި ގިނަ ހަމަލާތައް ނާކާމިޔާބުކޮށްލުމަށް ރާއްޖޭގެ ޑިފެންސުން މޮޅު ކުޅުމެއް ދެއްކިއިރު، ރާއްޖޭގެ ކުޅުންތެރިންވެސް ވަނީ އަފްޢާނުގެ ޑިފެންސް ލައިނަށް ބާރުބޮޑުކޮށްފައެވެ.

އަފްޢާނިސްތާނާ ރާއްޖެ ބައްދަލުކުރިމެޗުގެ ތެރެއިން..   ފޮޓޯ: އެފްއޭއެމް

މެޗްގައި ރާއްޖޭގެ ޓީމުގެ ތަޖުރިބާކާރު ކުޅުންތެރިން ފެނިގެން ގޮސްފައިވަނީ ފަހު ހާފްގައެވެ. އެގޮތުން އަހުޒަމްގެ ބަދަލުގައި ސެންޓޭ ކުޅެން އަރާފައިވާއިރު، ފޭދޫ އިއްބެ އަދި އަޝްފާގުވެސް ވަނީ ފަހު ހާފް ކުޅެން ނިކުމެފައެވެ. ނަތީޖާއަކަށް ވެގެންދިޔައީ ރާއްޖޭގެ ޓީމު ކުރިއަށްޖެހި އެޓޭކް ވަރުގަދަވުމެވެ.

މެޗްގައި އަޝްފާގް ކުޅެން ނިކުމެފައިވާއިރު މިއީ އޭނާ ޤައުމީ ޓީމަށް ކުޅުނު 100 ވަނަ މެޗެވެ. 

މުބާރާތުގައި ދެން ދިވެހިރާއްޖެ ނިކުންނާނީ މިމަހުގެ ހަތަރުވަނަ ދުވަހުގެ ހަވީރު، ޕާކިސްތާނާ ދެކޮޅަށެވެ. އަދި ހަމަ އެދުވަހު އަފްޢާނިސްތާން ނިކުންނާނީ ބަންގްލަދޭޝް އާ ދެކޮޅަށެވެ.