މާލެ, ދެވިނަމަގު މއ. ހިތިލާގެ ގުދަނުގެ ވެހިކަލްތަކަށް މުދާ ބަރުކުރުމަށާއި ބޭލުމަށް ހާއްސަކޮށްފައިވާ ހުސްޖާގައަށް އާންމުން ކުނިއަޅާ މައްސަލަ ބޮޑުވެ، އެކަން ހައްލުކުރުމަށް މާލެ ސިޓީ ކައުންސިލުން ހާއްސަ ފިޔަވަޅުތަކެއް އަޅަން ފަށައިފި އެވެ.
މި ސަރަހައްދަށް ކޮންމެ ދުވަހަކުވެސް ގިނަ އަދަދަކަށް ކުނިއަޅާ މައްސަލަ ތަކުރާރުކޮށް ކައުންސިލަށް ހުށަހަޅަމުން ކަމަށް އެ ކައުންސިލުން ބުނެ އެވެ. މިކަމަކީ އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނުގެ ދަށުން މަނާ ކަމެއްކަން އެ ކައުންސިލުން ވަނީ ހަނދާންކޮށްދީފަ އެވެ.
މި މައްސަލަ ހައްލުކުރުމުގެ ގޮތުން މާލެ ސިޓީ ކައުންސިލްގެ ކޮމިއުނިޓީ އެންގޭޖްމަންޓް ޔުނިޓުން އަންނަނީ އެ ސަރަހައްދަށް ކުނިއަޅާ މީހުން ހޯދައި ދެނެގަނެ، އެ ފަރާތްތަކާ މެދު ގާނޫނީ ފިޔަވަޅު އަޅަމުންނެވެ.
މި ސަރަހައްދަށް ކުނިއެޅުން މުޅިން ހުއްޓުވުމަށްޓަކައި ކޮމިއުނިޓީ އެންގޭޖްމަންޓް ޔުނިޓުގެ މުވައްޒަފުން މިހާރު އަންނަނީ އެ ސަރަހައްދުގައި ތިބެގެން ޑިއުޓީ ކުރަމުންނެވެ. މިއީ އެ ސަރަހައްދު ވިލަރެސްކޮށް، ކުނިއަޅާ ފަރާތްތައް ވަގުތުން ހުއްޓުވުމަށް އެޅި ފިޔަވަޅެއް ކަމަށް ކައުންސިލުން ބުނެ އެވެ.
މާލޭގެ މަގުތަކާއި ހުސްޖާގަތަކަށް ކުނިއެޅުމަކީ މާލެ ސިޓީ ކައުންސިލުން ނުހަނު ކަންބޮޑުވާ މައްސަލައަކަށް ވާއިރު، މިފަދަ އަމަލުތައް ކުރާ ފަރާތްތަކާމެދު ފަސްޖެހުމެއް ނެތި ފިޔަވަޅު އަޅާނެ ކަމަށް ވެސް ކައުންސިލުން ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
