ރާއްޖެއިން ފަރުވާ ލިބުނު ނަމަވެސް ފަރުވާއަށް ބޭރަށް ދާން އާސަންދަ ދެވޭނެ އުސޫލެއް ހަމަޖައްސައިފި އެވެ.

އެގޮތުން ބަލީގެ ބާވަތަށާއި ބަލި މިހާގެ ޙާލަތާއި ރާއްޖޭގައި ލިބެންހުރި ފަރުވާ ލިބުމުގައި ހުރި ދަތިތަކާއި ވަށައިގެންވާ އެހެނިހެން ކަންތައްތަކަށް ރިޢާޔަތްކޮށް ރާއްޖެއިން ލިބެން ހުރި ފަރުވާ ހޯދުމަށްވެސް އާސަންދަ ލިބޭނެ ގޮތް ވަނީ ހަމަޖައްސާފަ އެވެ.

މީގެ ކުރީން އުސޫލު އޮންނަ ގޮތުން އާސަންދަ ލިބެނީ ރާއްޖެއިން ފަރުވާ ލިބެން ނެތް ހާލަތެއްގަ އެވެ.

އަލަށް ގެނެސްފައިވާ ބަދަލުގައިވާ ގޮތުން ދެވޭނެ އިތުރު ފަރުވާއެއް ނެތް ކަމަށް ކަމާބެހޭ ހާއްސަ ޑޮކްޓަރުން ލަފާ ދިނުމަށް ފަހު އެނބުރި ރާއްޖެ އަންނަން ނުވަތަ ފަރުވާ ފުރިހަމަ ކުރުމަށް ފަހު އެނބުރި ރަށަށް ދިއުމަށްވެސް އާސަންދަ ލިބޭނެ ގޮތް ވަނީ ހަދާފަ އެވެ.

އުސޫލުގައިވާ ގޮތުން ރިފާ ކުރުމުގެ ހުއްދަ ދެވޭނީ އެ ބައްޔެއްގެ ހާއްސަ ޑޮކްޓަރުން ތިއްބަވާ އާސަންދަ ސްްކީމުގެ ދަށުން ހިދުމަތް ދިނުމަށް ރަޖިސްޓްރީވެފައިވާ ހިދުމަތްދޭ ތަންތަނަށެވެ. އަދި އެ ބައްޔެއްގެ ހާއްސަ ޑޮކްޓަރެއް އެ އަތޮޅުގައި ނުވަތަ އެ ރަށެއްގައި ނެތްނަމަ އާސަންދަ ކުންފުނިން ހުއްދަދޭ ޑޮކްޓަރަކަށް ރިފާ ކުރުމުގެ ހުއްދަ ދެވިދާނެ ކަމަށް ވެސް ވެ އެވެ.