މޯލްޑިވްސް ޕްރޮފެޝަނަލް ސްޕީކާސް އެސޯސިއޭޝަން، އެމްޕީއެސްއޭ އިން އިންތިޒާމުކުރާ "މޯލްޑިވްސް ޕްރޮފެޝަނަލް ސްޕީކާސް ސަމިޓް 2026" އަންނަ ޖުލައި މަހު ބޭއްވުމަށް ނިންމައި، ރަޖިސްޓްރީވުމުގެ ފުރުސަތު ހުޅުވާލައިފިއެވެ.

"ވޮއިސަސް އޮފް އިމްޕެކްޓް" ނުވަތަ ނުފޫޒުގަދަ އަޑުތަކުގެ ތީމްގެ ދަށުން ބާއްވާ މި ސަމިޓް އޮންނާނީ 2026 ޖުލައި 11 އިން 12 އަށް، ދިވެހިރާއްޖޭގެ ގައުމީ ޔުނިވަރސިޓީގެ ބިޒްނަސް ސްކޫލް އޮޑިޓޯރިއަމްގައެވެ. މިއީ މި ސަމިޓް ބާއްވާ ތިންވަނަ އަހަރެވެ.

މި ސަމިޓުގައި އެމެރިކާ، ސިންގަޕޫރު، ސްވިޑަން، އިންޑިއާ، އިނގިރޭސިވިލާތް އަދި ރަޝިއާ ފަދަ ގައުމުތަކުގެ މަޝްހޫރު ވާހަކަދެއްކުންތެރިންނާއި، ތަމްރީނުދޭ މާހިރުންނާއި، ކޯޗުން ބައިވެރިވާނެއެވެ. މީގެ އިތުރުން ރާއްޖޭގެ ފުންނާބުއުސް ވާހަކަދެއްކުންތެރިންނާއި އިލްމީ މާހިރުންވެސް މި ބައްދަލުވުމުގައި އެމީހުންގެ ތަޖުރިބާ ހިއްސާކުރާނެއެވެ.

އެމްޕީއެސްއޭ އިން ހާމަކުރި ގޮތުގައި، މި ސަމިޓް ބޭއްވުމުގެ މައިގަނޑު މަގްސަދަކީ މުޢާމަލާތްކުރުމުގެ ހުނަރު ބޭނުންކޮށްގެން ލީޑަޝިޕް ވަރުގަދަކުރުމަށާއި، ވިޔަފާރި ކުރިއެރުވުމަށާއި، އަމިއްލަ ނަފްސު ތަރައްގީކުރުމަށް މީހުން އަހުލުވެރިކުރުވުމެވެ. ޚާއްޞަކޮށް އާޓިފިޝަލް އިންޓެލިޖެންސް، އޭއައި އާއި އާ އީޖާދުތަކާއެކު މަސައްކަތުގެ މާހައުލު ބަދަލުވަމުންދާ މި ދަނޑިވަޅުގައި، އެފެކްޓިވް ކޮމިއުނިކޭޝަން ނުވަތަ މުއާމަލާތްކުރުމުގެ ހުނަރަކީ ކޮންމެ ދާއިރާއެއްގައިވެސް ކާމިޔާބީގެ އަސްލުކަމަށް އެ ޖަމިއްޔާއިން ގަބޫލުކުރެއެވެ.

ދެ ދުވަހުގެ މުއްދަތަށް ކުރިއަށްދާ މި ސަމިޓުގައި ޕްރޮފެޝަނަލް ސްޕީކިންގ، ސްޓޯރީޓެލިންގ، އޯޑިއަންސް އެންގޭޖްމަންޓް، ޕާސަނަލް ބްރޭންޑިންގ އަދި ލީޑަޝިޕް ކޮމިއުނިކޭޝަން ފަދަ މުހިންމު މައުޟޫއުތަކަށް ސެޝަންތައް ކުރިއަށްދާނެއެވެ. މިއީ ވާހަކަދެއްކުންތެރިންނާއި، ޓީޗަރުންނާއި، ވިޔަފާރިވެރިންނާއި، އަދި މުއާމަލާތްކުރުމުގެ ހުނަރު ކުރިއަރުވަން ބޭނުންވާ ކޮންމެ ފަރާތަކަށްވެސް ހުޅުވާލެވިފައިވާ ރަނުގެ ފުރުސަތެކެވެ.

އެމްޕީއެސްއޭ އިން ބުނި ގޮތުގައި މި އަހަރުގެ ތީމް "ވޮއިސަސް އޮފް އިމްޕެކްޓް" އިޚްތިޔާރުކުރީ ކޮންމެ މީހެއްގެ އަޑަކީވެސް މުޖުތަމައަށް ހެޔޮ ބަދަލެއް ގެނައުމުގެ ބާރު ލިބިގެންވާ އެއްޗަކަށްވާތީއެވެ.

މި ސަމިޓުގައި ބައިވެރިވުމަށް އެދޭ ފަރާތްތަކަށް މިހާރު ވަނީ ރަޖިސްޓްރޭޝަން ހުޅުވާލާފައެވެ. އެމްޕީއެސްއޭ ގެ މެންބަރުންނަށާއި އާންމު ރައްޔިތުންނަށްވެސް ތިރީގައިވާ ލިންކު މެދުވެރިކޮށް ރަޖިސްޓްރީ ކުރެވޭނެއެވެ.

ރަޖިސްޓްރޭޝަން ލިންކު: https://form.jotform.com/261473032440043