އަބަދުވެސް ހިތް އޮންނަނީ އެމްޑީޕީގައި ކަމުގައި ވިދާޅުވެ އެމްޑީޕީ ދޫކޮށް ނުދާނެ ކަމުގެ ޔަގީންކަން އެ ޕާޓީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ ޗެއާޕާސަން އިންތިހާބުގެ ކެމްޕެއިންގައި ށ. ކޮމަންޑޫއަށް ވަޑައިގެން އެ ރަށުގެ ރައްޔިތުންނާއި ވާހަކަ ދައްކަވަމުންނެވެ. ނަޝީދުއާ ވާދަކުރައްވާ މެންބަރު މީކާއީލްގެ ސަޕޯޓަރުން އެންމެ ބޮޑަށް ފާހަގަ ކުރާ އެއް ކަމަކީ ޕާޓީއަށް އެންމެ މުހިންމުވީ ވަގުތު ނަޝީދު އެ ޕާޓީ ދޫކޮށްލެއްވުމެވެ. އަދި އެމްޑީޕީ "ރޫޅާލާނަން" ކަމަށް ވިދާޅުވެ އެ ޕާޓީގެ ވެރިކަން ނިންމަން ނަޝީދުގެ ފެކްޝަނުން ކުރި މަސައްކަތެވެ.
ނަޝީދު ވިދާޅުވީ މެންބަރުންގެ ޝަކުވާތައް ހުރިކަން ގަބޫލު ކުރައްވާ ކަމަށެވެ. ނަމަވެސް ވިދާޅުވީ އަބަދުވެސް ހިތް އޮންނަނީ އެމްޑީޕީގައި ކަމަށެވެ. އަދި އެމްޑީޕީ ދޫކޮށް ނުދާނެ ކަމުގައި ވިދާޅުވި އެވެ.
ނަޝީދު މިހެން ވިދާޅުވެ ތަކުރާރު ކުރައްވާ މިންވަރު ދަނީ އިތުރުވަމުންނެވެ. އެއީ އިންތިހާބުން ބަލިވެއްޖެނަަމަ ނަޝީދު އެމްޑީޕީގައި ނުހުންނަވާނެ ކަމަށް މީކާއީލްގެ ޓީމުގެ މެންބަރުން ބުނާތީ އެވެ.
ކުރީން އޮތް ބައްދަލްވުމެއްގައި ނަޝީދު ވަނީ އިންތިހާބުން ބަލިވެއްޖެނަމަ "މުންޑު އަނދެގެން ދެން އޮންނާނީ ގޭގައި" ކަމަށް ވެސް ވިދާޅުވެފަ އެވެ.
އެމްޑީޕީގެ ޗެއާޕާސަން އިންތިހާބުގެ ކެމްޕެއިން ވަނީ ވަރަށް ފޯރިގަދަވެފަ އެވެ. މި އިންތިހާބުގައި ރައީސް ސޯލިހްގެ ތާއީދު އޮތީ މީކާއީލަށެވެ. އެހެން ކަމުން މިއީ ރައީސް ނަޝީދާއި ރައީސް ސޯލިހްގެ އިންތިހާބެއްގެ ގޮތުގައި ވަނީ ބެލެވިފަ އެވެ.
Advertisement
This content is created and paid for by advertisers and does not involve Voice Journalists
