އަމިއްލަ ނަފުސަށް އިތުބާރުކުރާ، ޢަޤީދާ ވަރުގަދަ، އަދި ޤައުމިއްޔަތަށް ލޯބިކުރާ ޒިންމާދާރު ޖީލެއް ބިނާކުރުމަށް ސަރުކާރުން ކުރިއަށްގެންދާ ދިވެހި ވަޠަނީ ޚިދުމަތުގެ ދެވަނަ ބެޗުގެ ފަންނީ ތަމްރީނުތަކުގައި ބައިވެރިވާ ޒުވާނުން މިއަދު ބ. ކިހާދޫއަށް ފުރައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މި ތަމްރީނުތަކަކީ ރޫޙާނީ އަދި ޖިސްމާނީ ގޮތުން ދުޅަހެޔޮ، ޒިންމާދާރު ރައްޔިތެއް ބިނާކުރުމަށް ސަރުކާރުން ފަށާފައިވާ މުހިންމު މަސައްކަތެއް ކަމަށެވެ.

މިއަދު ފުރި ބައިވެރިންނަކީ ވަޠަނީ ޚިދުމަތުގެ ދެވަނަ ބެޗުގެ ތެރެއިން ފަންނީ ތަމްރީނު ފުރިހަމަކުރުމަށް ކުރިމަތިލީ ޒުވާނުންނެވެ.

މި ތަމްރީނުތައް ކުރިއަށްދާނީ ބ. ކިހާދޫގައި ޤާއިމުކޮށްފައިވާ އެމް.އެން.ޑީ.އެފްގެ "ސްކޫލް އޮފް އިންޖިނިއަރިން އެންޑް ލޮޖިސްޓިކްސް" ގައެވެ. މި ބެޗުގައި ރާއްޖޭގެ 17 އަތޮޅެއްގެ 50 ރަށަކަށް ނިސްބަތްވާ 77 ޒުވާނުން ބައިވެރިވެއެވެ. މި ޒުވާނުންނަކީ އުމުރުން 16 އަހަރާއި 19 އަހަރާ ދެމެދުގެ ކުދިންނެވެ.

މި ތަމްރީނު ޕްރޮގްރާމުގެ ތެރެއިން ތަފާތު 6 ފަންނީ ދާއިރާއަކުން ތަމްރީނު ފުރިހަމަކުރުމުގެ ފުރުޞަތު ބައިވެރިންނަށް ލިބިގެންދާނެއެވެ.

ދިވެހި ވަޠަނީ ޚިދުމަތަކީ ރައީސް ޑރ. މުޢިއްޒުގެ ސަރުކާރުން، ދިވެހި ޒުވާނުންގެ ކިބައިގައި ޤައުމީ ވަހުދަތާއި، އަދަބު އަޚްލާޤާއި، މަސައްކަތްތެރިކަމުގެ ރޫޙު އާލާކުރުމަށް ފަރުމާކޮށްފައިވާ ޕްރޮގްރާމެކެވެ.