އިންޑިއާގެ ނިއުދިއްލީގެ ހައުޒް ރާނީ ސަރަހައްދުގައި ހުންނަ ބެޑް އެންޑް ބްރެކްފަސްޓް ހޮޓަލުގައި ހިނގި އަލިފާނުގެ ހާދިސާގައި މަދުވެގެން 21 މީހަކު މަރުވެއްޖެއެވެ.
ދިއްލީގެ ކަމާ ބެހޭ އޮފިޝަލުން ބުނީ މަރުވި މީހުންގެ ތެރޭގައި އިންޑިއާގެ އިތުރުން އެހެން ގައުމުތަކަށް ނިސްބަތްވާ މީހުންވެސް ހިމެނޭކަމަށެވެ. އިމާރާތުގައި އަލިފާން ރޯވުމާއެކު، އަލިފާންގަނޑުން ސަލާމަތްވުމަށްޓަކައި ގިނަ ބަޔަކު ވަނީ އިމާރާތުގެ މަތީ ބުރިތަކުން ތިރިއަށް ފުންމާލާފައެވެ. އެހެންކަމުން މަރުވި މީހުންގެ ސީދާ އަދަދު އިތުރުވާނޭކަމަށް އޮފިޝަލުން ވަނީ ބުނެފައެވެ.
ފުލުހުން މައުލޫމާތު ދޭ ގޮތުގައި މިހާތަނަށް ލިބުނު މައުލޫމާތުތަކަށް ބަލާއިރު، މަރުވި މީހުންގެ ތެރޭގައި ހިމެނެނީ ބޭރު ގައުމުތަކަށް ނިސްބަތްވާ 12 މީހަކާއި އިންޑިއާގެ 9 މީހެކެވެ. ހައުޒް ރާނީ ސަރަހައްދުގެ ކައިރީގައި ބޮޑު ހޮސްޕިޓަލެއް ހުރުމުގެ ސަބަބުން ބަންގްލަދޭޝް، ނައިޖީރިއާ، މޮޒަމްބީކް، ލައިބީރިއާ އަދި އެފްރިކާ އާއި މެދުތެރޭ އޭޝިއާގެ ގައުމުތަކުން ބޭސްފަރުވާއަށް އަންނަ ބަލިމީހުންނާއި އެމީހުންގެ އާއިލާތަކުން އާންމުކޮށް މި ސަރަހައްދުގެ ގެސްޓްހައުސްތަކުގައި މަޑުކުރެއެވެ.
މިއީ 2022 ވަނަ އަހަރު މުންޑްކާގެ އިލެކްޓްރޯނިކްސް ކާރުޚާނާއެއްގައި ހިނގި އަލިފާނުގެ ހާދިސާގައި 27 މީހުން މަރުވި ފަހުން، ދިއްލީގައި ހިނގި އެންމެ ނުރައްކާތެރި އަލިފާނުގެ ހާދިސާއެވެ. އަލިފާނުގެ ހާދިސާ ހިނގި ސަރަހައްދަކީ ތާރީހީ ސަރަހައްދެކެވެ. 12 ވަނަ ގަރުނުގެ ތާރީޚެއް އޮންނަ ހައުޒް ރާނީ އަކީ ހަނި ގޯޅިތަކެއް ހިމެނޭ ސަރަހައްދެކެވެ.
Advertisement
This content is created and paid for by advertisers and does not involve Voice Journalists
