ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އިންތިޒާމުކޮށްގެން ބާއްވާ "އެމް.އެން.ޔޫ ފަހި ފުރުސަތު" ޔުނިވަރސިޓީގެ މައި މަރުކަޒާއި، އަތޮޅުތަކުގެ ކެމްޕަސްތަކުގައި މިއަދު، ރަސްމީކޮށް ހުޅުވައިފިއެވެ.

މި އިވެންޓް އިފްތިތާހު ކޮށްދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ. މަހުމޫދު ޝައުގީ އެވެ.

މި މަހުގެ 03 އިން 05 އަށް ކުރިއަށްދާ މި ހަރަކާތަކީ އެމް.އެން.ޔޫ އިން ދަސްވެނިވާ ދަރިވަރުންނަށާއި، ވަޒީފާގެ ބާޒާރަށް ނުކުންނަން ތައްޔާރުވާ ފަރާތްތަކުގެ އިތުރުން، އާންމު ހުރިހާ ފަރާތްތަކަށް ހުޅުވާލައިގެން ބާއްވާ ބޮޑު މައުރަޒެކެވެ.

މި އިވެންޓް ކުރިއަށްދާނީ މި ތިން ދުވަހުގެ ހަވީރު 16:00 އިން ރޭގަނޑު 22:00 އަށް އެމް.އެން.ޔޫ އިދާރީ މަރުކަޒުގައެވެ. އަދި އެހެން އަހަރުތަކެކޭ އެއްފަދައިން، މާލޭގެ އިތުރުން، އަތޮޅުތަކުގައި ހުރި އެމް.އެން.ޔޫ ކެމްޕަސްތަކުގައިވެސް މި ފެސްޓިވަލް ކުރިއަށްދާނެއެވެ. އަތޮޅު ކެމްޕަސްތަކުގައި ހަރަކާތް ކުރިއަށްދާނީ ޖޫން 3 އަދި 4 ވަނަ ދުވަހުއެވެ.

މިފަހަރުގެ ފެސްޓިވަލްގައި، 32 އަށް ވުރެ ގިނަ މުއައްސަސާތަކުން ބައިވެރިވެފައިވެއެވެ. އޭގެ ތެރޭގައި، ސަރުކާރުގެ އެކި މުއައްސަސާތަކާއި އަމިއްލަ ބޮޑެތި ކުންފުނިތަކުގެ ސްޓޯލްތައް ހިމެނެއެވެ. މި މައުރަޒުގެ ތެރެއިން ވަޒީފާގެ ފުރުސަތުތަކުގެ މައުލޫމާތު ދިނުމުގެ އިތުރުން، ދާއިރާތަކުން ކުރިއަށްދާން ބޭނުންވާ ފަރާތްތަކަށް ބޭނުންވާ ކެރިއަރ ގައިޑެންސް ދިނުންވެސް ކުރިއަށްދާނެއެވެ.

ދިވެހިރާއްޖޭގެ ޤައުމީ ޔުނިވަރސިޓީން ބާއްވާ ފަހި ފުރުސަތަކީ ރާއްޖޭގައި، ވަޒީފާ އުފައްދާ ފަރާތްތަކާއި، ވަޒީފާ ދޭ ފަރާތްތަކާއި، އަދި ވަޒީފާ ހޯދަން ބޭނުންވާ ފަންނީ، ހުނަރުވެރި ޒުވާނުން، އެއް ފުރާޅެއްގެ ދަށުން ބައްދަލުވެ ގުޅުން ބަދަހިކުރުމަށް ތަނަވަސްކޮށްދޭ މުހިންމު މައުރަޒެކެވެ.