ޒަމާނުއްސުރެ މިފްކޯ ހިންގަމުން އައި ގޮތަށް މިއަދު ބޮޑެތި ބަދަލުތަކެއް ގެންނަން ޖެހިފައިވާކަމަށް އެކުންފުނީގެ ސީއީއޯ އަދި މެނޭޖިން ޑިރެކްޓަރު ކަމަށް އަލަށް ހަވާލުވެ ވަޑައިގެންނެވި މުހައްމަދު އަނަސް ވިދާޅުވެއްޖެއެވެ.

މިފްކޯގެ ދަށުން ހިންގަމުން އަންނަ ކޫއްޑޫ ފިޝަރީޒް ކޮމްޕްލެކްސްއަށް ކުރެއްވި ޒިޔާރަތުގައި މުއައްޒަފުންނާ ބައްދަލުކުރައްވައި އަނަސް ވިދާޅުވީ، ކުރިންސުރެ މިފްކޯ ހިންގަމުން އައި ވައްޓަފާޅި ބަދަލުކޮށް ކުންފުންޏަށް ބޮޑެތި ބަދަލުތަކެއް މިއަދު ގެންނަން ޖެހިފައިވާކަމަށެވެ. ސިނާން ވިދާޅުވީ އޭނާގެ ތަސައްވުރަކީ މިފްކޯއަށް އިސްލާހީ ބަދަލުތަކެއް ގެނައުން ކަމަށާއި، ކުންފުންޏަކީ ސަރުކާރުގެ ސައްތައިން ސައްތަ ހިއްސާވާ ކުންފުންނަކަށް ވުމާވެސް އެކުގައި ބަދަލުތަކެއް ގެނެސް ކުންފުނި ޒަމާނީކުރަން ޖެހިފައިވާކަމަށެވެ.

މިފްކޯގެ ހިންގުން ޒަމާނާ އެއްގޮތަށް ބަދަލުކުރުމުގެ މަސައްކަތް މިހާރުވެސް ފަށާފައިވާކަން އޭނާ ފާހަގަކުރެއްވިއެވެ. މިފްކޯއަށް އިތުރަށް އާމްދަނީ ހޯދޭނެ ގޮތްތައް ހޯދައި ކުންފުންޏަށް ލިބޭ އެއްޗެއް އިތުރުކޮށް މުއައްޒަފުންގެ އާމްދަނީ އިތުރުކުރަން ޖެހޭކަންވެސް އަނަސް ފާހަގަކުރެއްވިއެވެ. 

މުއައްޒަފުންނާ ބައްދަލުކުރައްވައި ވާހަކަދައްކަވަމުން ސިނާން ވަނީ، ހުރިހާ މުވައްޒަފުން ވެސް މަސައްކަތުގެ އަޚްލާޤު ހިފައްޓައި، ގުޅިގެން އެއް ޓީމެއްގެ ގޮތުގައި މަސައްކުރުމަށް އެދިފައެވެ. އަދި ހުރި މައްސަލަތައް ދެނެގަނެ މުވައްޒަފުންގެ ހުރި ކަންބޮޑުވުންތައް ރަނގަޅު ކުރައްވާނޭކަމަށް ވަނީ ވިދާޅުވެފައެވެ.

މަގާމާ ހަވާލުވެ ވަދައިގަތުމަށްފަހު ހެޑް އޮފީހުގެ މުއައްޒަފުންނާ ބައްދަލުކުރެއްވުމަށްފަހު ސިނާން ވަނީ މިފްކޯގެ ސެންޓަުތަކަށް ޒިޔާަރަތްކޮސް އެތަންތަނުގައި ހުރި މައްސަލަތައް ބަލައި ރަނގަޅުކުރެވެން ހުރި ކަންކަން ރަނގަޅުކުރުމަށް ފިޔަވަޅު އަޅުއްވަން ފައްޓަވާފައެވެ.

މިފްކޯއަކީ ދިވެހި ޤައުމީ މަސްކުންފުންޏެވެ. އަދި އެކުންފުންޏަކީ މަސްވެރިންނާއި އަދި ދިވެހިންނާ ވަރަށްބޮޑަށް ގުޅި ލާމެހިފައިވާ ކުންފުންޏެއްވެސް މެއެވެ.