އައްޑޫގެ އުމްރާނީ ހުރިހާ ތަރައްގީއަކީ އެމްޑީޕީގެ އެއްޗެއް ކަމަށާ، އިތުރު އެއްވެސް ސަރުކާރަކުން އައްޑޫގެ ތަރައްގީއަށް ކަމެއް ކޮށްދީފައި ނުވާ ކަމަށް ކުރީގެ ރައީސް މުޙައްމަދު ނަޝީދު ރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ޓިކެޓްގައި ވާދަކުރައްވާ ކެންޑިޑޭޓު އަބްދުالله ސޯދިގު (ސޯބެ)ގެ ކެމްޕެއިން ނިންމާލުމަށް ރޭ ބޭއްވި ޖަލްސާގައި ވާހަކަދައްކަވަމުން ނަޝީދު އެމްޑީޕީ ސަރުކާރުތަކުން ކޮށްދީފައިވާ ކަންކަމުގެ މައްޗަށް އަލިއަޅުވާލައްވާފައެވެ.
އައްޑޫގައި އެމްޑީޕީގެ ސަރުކާރަކުން ފިޔަވައި ތަރައްގީގެ ކަމެއް، އިޖުތިމާޢީ ކަމެއް ކުރެވިފައި އޮތްތަނެއް ނުފެންނާނެ. ދޮށީ އުމުރު މީހުންނަށް އެއްޗެއް ދެވުނީ އެމްޑީޕީން، އެކަނިވެރި މައިންނަށް އެއްޗެއް ދެވުނީ އެމްޑީޕީން. ނުކުޅެދޭ މީހުންނަށް އެއްޗެއް ދެވުނީ އެމްޑީޕީން. ޔަތީމު ކުދިންނާ އަޅާލެވުނީ އެމްޑީޕީން. އެންމެ މަތީ އުޖޫރަ ދެވުނީ އެމްޑީޕީން. ބޭސްސިޓީއަށް ސަލާންޖެހިން ހުއްޓުވާލީ އެމްޑީޕީން. ފޮތް ލިސްޓަށް އާދޭސް ކުރުން ހުއްޓުވާލީ އެމްޑީޕީން.
ރައީސް ނަޝީދު
އެއާއެކު ނަޝީދު ވިދާޅުވީ އައްޑޫ ސިޓީއަށް އުމްރާނީ ގޮތުން އައިސްފައިވާ ހުރިހާ ތަރައްގީއަކީ އެމްޑީޕީން ގެނެސްދިން އެއްޗެއް ކަމަށެވެ. އަދި އެހެން ސަރުކާރުތަކުން އެ ސިޓީއަށް ކަމެއް ކޮަށްދީފައި ނުވާ ކަމަށްވެސް ވިދާޅުވިއެވެ.
މި އައްޑޫ ސިޓީގައި މިވާ ހުރިހާ އުމްރާނީ ތަރައްޤީއެއް، އެއީ އިތުރުބައެއްގެ އެއްޗެއް ނޫން. އެމްޑީޕީގެ އެއްޗެއް.
ރައީސް ނަޝީދު
ނަޝީދު އިތުރަށް ވިދާޅުވީ ރާއްޖެ ދަނީ އަނދަވަޅަކަށް ވެއްޓެމުން ކަމަށާއި ދަރަނީގެ ދަންތުރައެއްގައި ޖެހެމުންދާ ކަމަށެވެ. އެހެންކަމުން، މަޖިލީހަށް ފޮނުވަން ޖެހޭނީ، ތަޢުލީމީ ބޭފުޅެއް ކަމަށާ، އެ ބޭފުޅަކަށް ދުނިޔޭގައި ހިނގާ ކަންތައް އެނގިވަޑައިގަންނަވަން ޖެހޭނެ ކަމަށް ވިދާޅުވުއެވެ.
އަދި އެފަދަ ބޭފުޅަކީ ސޯބެ ކަމަށްވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
