މިއަދު ކުރިއަށްދާ އައްޑޫސިޓީ ހިތަދޫ އުތުރު ދާއިރާގެ ބައި އިލެކްޝަނުގައި މިހާތަނަށް 32.6 އިންސައްތަ މީހުން ވޯޓުލައިފިއެވެ.

ވޯޓު ލުމަށް ދީފައިވާ ވަގުު ދެބައިވެގެން ދިޔައިރު، މިހާތަނަށް ވޯޓު ލާފައިވަނީ ނިސްބަތުން މަދު ބައެވެކެވެ. އިލެކްޝަނުން އާއްމުކޮށްފައިވާ މައުލޫމާތަށް ބަލާއިރު، މިއަދު އެކެއް ޖެހުމާ ހަމަޔަށް ވޯޓު ލާފައިވަނީ ވޯޓުލުމުގެ ހައްގު ލިބިފައިވާ 4،121 މީހުންގެ ތެރެއިން، 1344 މީހުންނެވެ. 

ވޯޓުލެވޭ މީހުންގެ 32.6 އިންސައްތަ ވޯޓު ލާފައިވާއިރު، ވޯޓު ނުލާ މީހުންގެ ނިސްބަތަކީ، 67.3 އިންސައްތައެވެ. މިއަދުގެ ވޯޓުލުން 8 ޖެހިއިރު ފަށާފައިވާއިރު، ހަވީރު 4 ޖެހުމާ ހަމައަށް ވޯޓުލުމުގެ ފުރުސަތު ވަނީ ހުޅުވާލާފައެވެ. 

އައްޑޫސިޓީ ހިތަދޫ އުތުރު ދާއިރާގެ ބައި އިލެކްޝަނުގައި ވޯޓުލުމަށް އައްޑޫސިޓީގައި ފަސް ފޮށި ބަހައްޓާފައިވާއިރު، މާލޭގައި ބަހައްޓާފައިވަނީ، ދެ ފޮއްޓެވެ.

ހިތަދޫ އުތުރު ދާއިރާގެ ރައްޔިތުންގެ މަޖިލީހުގެ ބައި-އިލެކްޝަން ބާއްވަން ޖެހުނީ އެ ދާއިރާގެ ކުރީގެ މެންބަރު މުހައްމަދު ސިނާންގެ ގޮނޑި ގެއްލިފައިވާ ކަމަށް ކަނޑައެޅުމާއި ގުޅިގެންނެވެ. ސުޕްރީމް ކޯޓުން އެ ނިންމުން ނިންމީ އޭނާގެ މައްޗަށް ސާބިތު ދަރަންޏެއް އޮތް ކަމަށް ސާބިތުވުމުންނެވެ.