އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ކާމިޔާބު ކުރުމާ ގުޅިގެން، ވެރިކަންކުރާ ޕީއެންސީން ދައްކަމުންދާ ވާހަކަތަކަށް ކުރީގެ ރައީސް މުޙައްމަދު ނަޝީދު ފާޑުތވިދާޅުވެއްޖެއެވެ.

މި އިންތިޚާބުގެ ވަގުތީ ނަތީޖާ ދައްކާގޮތުން، ގޮނޑި ކާމިޔާބު ކުރެއްވި އެމްޑީޕީގެ ކެންޑިޑޭޓް އަބްދުالله ސޯދިގަށް ލިބިވަޑައިގަތީ 1375 ވޯޓެވެ. އެއީ ވޯޓުލީ މީހުންގެ 51.15 އިންސައްތައެވެ. ސަރުކާރު ހިންގާ ޕީއެންސީގެ ކެންޑިޑޭޓް އަޙްމަދު ސަޢީދަށް ލިބިވަޑައިގަތީ 1313 ވޯޓެވެ. އެއީ 48.85 އިންސައްތައެވެ.

ދެ ކެންޑިޑޭޓުންގެ ދެމެދުގައި އޮތް ފަރަގަކީ 62 ވޯޓެވެ. އިންތިޚާބުގައި އައްޑޫ ސިޓީ ހިތަދޫގައި ބަހައްޓާފައި ހުރި ފޮށިތަކުން ކުރި ހޯދީ ސަޢީދެވެ. ނަމަވެސް ނަތީޖާ ބަދަލުވީ މާލެ ފޮށިތަކުންނެވެ. 

އެހެންކަމުން ވެރިކަންކުރާ ޕާޓީން އަންނަނީ ގޮނޑި ނުލިބުނު ނަމަވެސް އެ ނަތީޖާއަކީ ކާމިޔާބީއެއް ކަމަށް ފާހަގަކުރަމުންނެވެ. 

އެކަމަށް ފާޑުވިދާޅުވެ ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ ބައެއް ފަހަރު ތަޅާފޮޅާއިރު ވާގޮތަށް ކަންތައްތައް މެދުވެރިވެފައިވާ ކަމަށެވެ.

”ގަދަ މީހާ ޖަހާއިރަށް، އަނގައިން ބަލިނުވާ މީހާ "ދެން ޖަހާބަލަ" އޭ ބުނާނެ. ނަމަވެސް އެންމެ ފަހުން ހެސް ކިޔާފައި ކަންކަށީގައި ޖަހާ ވައްޓާލުމުން "އަދި ކިރިޔާ ޖެހުނު ކަމަށް" ބުނާނެ“ ނަޝީދު ވިދާޅުވިއެވެ. 

ހިތަދޫ އުތުރު ދާއިރާގެ ގޮނޑިއަކީ މީގެ ކުރިން ޕީއެންސީ އަތުގައި ބޮޑު އަޣުލަބިއްޔަތަކުން އޮތް ގޮނޑިއެއްކަން ފާހަގަކުރައްވަމުން ނަޝީދު ވިދާޅުވީ، އެމްޑީޕީން އެ ގޮނޑި ހޯދުމަކީ ރައީސް މުޢިއްޒު ރަނގަޅަށް ބަލިވުން ކަމަށެވެ.