މިހާރު ކުރިއަށްދާ ޑައިމަންޑް ޖުބިލީ އިންޓަނޭޝަނަލް ފުޓުބޯޅަ މުބާރާތުގައި މިރޭ ދިވެހިރާއްޖެ އާއި ބަންގްލަދޭޝް ބައްދަލުކުރިމެޗް ބޮޑު ހަމަނުޖެހުމަކާއެކު ނިންމާލައިފިއެވެ.

ގަލޮޅު ދަނޑުގައި ކުޅުނު މިމެޗް ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ. މެޗްގައި އެންމެ ފުރަތަމަ ލަނޑެއްޖަހައި ކުރި ހޯދީ ރާއްޖެއެވެ. އެއީ މެޗްގެ 13 ވަނަ މިނެޓް ތެރޭގައި ލިބުނު ޕެނަލްޓިއަކުންނެވެ. މި ލަނޑު ކާމިޔާބުކޮށްދިނީ އަލީ ފާސިރެވެ. 

ރާއްޖެއިން ލަނޑެއް ޖަހާފައިވަނިކޮށް ބަންގްލަދޭޝް އިން މެޗް އެއްވަރުކުރީ ދެވަނަ ހާފްގައެވެ. މިރަޖުލް އިސްލާމް މި ލަނޑު ޖަހާފައިވަނީ ދެވަނަ ހާފްގެ ވަރަށް ކުރީކޮޅުއެވެ.

މެޗްގެ އެންމެ ފަހު ވަގުތުގެ ތެރޭގައި ހަމަނުޖެހުންތައް ފެށިގެންދިޔައީ ރެފްރީއާ މެދު ހިތްހަމަ ނުޖެހިގެން ބަންގްލަދޭޝް ޓީމަށް ދެއްކި ރަތްކާޑުތަކުންނެވެ. މެޗްގެ ހަމަނުޖެހުންތައް ބޮޑަށް ފެށިގެން ދިޔައީ އެންމެފަހުން އަލް އަމީނަށް ދެއްކި ރަތްކާޑަށް ފަހުގައެވެ. 

މެޗްގެ ފަހުވަގުތުކޮޅުގެ ތެރޭގައި ބަންގްލަދޭޝްގެ ޕެނަލްޓީ އޭރިއާ ތެރެއިން ބަންގްލަދޭޝްއަށް ގޯލް ކުރިމަތިން އެޓީމަށް ލިބުނު ޖެހުމަކަށް ހުރަސް އެޅި ހިސާބުންނެވެ. އެވަގުތު ދެޓީމްގެ ކުޅުންތެރިންގެ މެދުގައި އުފެދުނު ހަމަނުޖެހުންތަކުގެ ތެރެއަށް ބަންގްލަދޭޝްގެ ސަޕޯޓަރުން އަރައިގަނެ އެންމެފަހުން ވަނީ މާރާމާރީއަކަށް ބަދަލުވެގެން ގޮސްފައެވެ. އެހިސާބުން ރެފްރީ ވަނީ މެޗް ނިމުނުކަންވެސް އިއުލާނުކޮށްފައެވެ.

ދަނޑަށް އެރި ބަންގްލަދޭޝްގެ ސަޕޯޓަރުން މައިތިރިކުރީ ފުލުހުންނާއި މެޗް އޮފިޝަލުން ވެގެންނެވެ.

މިރޭގެ މެޗް ހޫނުވި އެންމެ ބޮޑު ސަބަބަކީ މުބާރާތުގައި ބަންގްލަދޭޝްއަށް އިތުރަށް ކުރިއަށް ދެވެން އޮތީ ރާއްޖެ ބަލިކޮށްގެން ކަމަށްވާތީއެވެ.