މިއަދު ފަތިހު ފިލިޕިންސްގެ މިންޑަނާއޯ ސަރަޙައްދަށް އައި ބާރުގަދަ ބިންހެލުމާ ގުޅިގެން، އިންޑިއާ ކަނޑުގެ ސަރަޙައްދަށް ސުނާމީއެއް އުފެދުމުގެ ބިރު ނެތް ކަމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން ހާމަކޮށްފިއެވެ.

މެޓް އޮފީހުން މަޢުލޫމާތު ދީފައިވާ ގޮތުގައި، މި ބިންހެލުން އައިސްފައިވަނީ މިއަދު ފަތިހު ރާއްޖެ ގަޑިން 4:37 ހާއިރުއެވެ. ރިކްޓަރ މިންގަނޑުން 8.1 މެގްނިޓިއުޑްގެ ބާރުމިނުގައި އައި މި ބިންހެލުން އުފެދިފައިވަނީ ބިމުގެ 93 ކިލޯމީޓަރު އަޑިންނެވެ. މި ބިންހެލުން އައި ސަރަޙައްދަކީ ދިވެހިރާއްޖޭގެ ވެރިރަށް މާލެއާ ގާތްގަނޑަކަށް 5,723 ކިލޯމީޓަރު ދުރުގައި އޮތް ސަރަޙައްދެކެވެ.

މި ބާރުގަދަ ބިންހެލުމަށްފަހު އެ ސަރަޙައްދަށް އިތުރު ދެ ބިންހެލުމެއް އައިސްފައިވާ ކަމަށް ރިޕޯޓްތައް ބުނެއެވެ. އެގޮތުން 6.4 މެގްނިޓިއުޑްގެ ބިންހެލުމަކާއި، 6.6 މެގްނިޓިއުޑްގެ ބިންހެލުމެއް އައިސްފައިވެއެވެ.

މި ބިންހެލުންތަކުގެ އަސަރު ފިލިޕިންސްގެ އިތުރުން އިންޑޮނޭޝިއާ އަދި މެލޭޝިއާއަށް ވެސް ކޮށްފައިވާ ކަމަށް މަޢުލޫމާތު ލިބެއެވެ.

މި ހާދިސާގައި ފިލިޕިންސްގެ ބައެއް އިމާރާތްތައް ބިމާ ހަމަވެ، ބޮޑެތި ގެއްލުންތަކެއް ލިބިފައިވާކަން ފާހަގަކުރެވެއެވެ. ނަމަވެސް، މިހާތަނަށް އެއްވެސް މީހަކަށް އަނިޔާވިކަމުގެ ރަސްމީ ރިޕޯޓެއް އެ ޤައުމުގެ ސަރުކާރުން ހާމަކޮށްފައެއް ނުވެއެވެ.

ރާއްޖޭގެ މެޓް އޮފީހުން ބުނީ، މި ބިންހެލުމާ ގުޅިގެން އިންޑިއާ ކަނޑުގެ ސަރަޙައްދުގައި ސުނާމީއެއް އުފެދިފައި ނުވާ ކަމަށެވެ.