ދިވެހިރާއްޖޭގައި މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު (އާރްޓީއައި) 2014 ވަނަ އަހަރު ތަޞްދީޤުކުރި ފަހުން، ރައީސުލްޖުމްހޫރިއްޔާގެ އޮފީހާއި ސަރުކާރުގެ ހުރިހާ ވުޒާރާތަކަކުން އިސްނަގައިގެން މަޢުލޫމާތު ހާމަކުރުމުގެ ޝަރުޠުތައް ސައްތަ އިންސައްތަ ފުރިހަމަކޮށްފައިވާ ކަމަށާ، މިއީ ތާރީޚީ ކާމިޔާބީއެއް ކަަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ރާއްޖޭގެ ތާރީޚުގައިވެސް މިފަދަ ނަތީޖާއެއް ހާސިލުކުރި ފުރަތަމަ ފަހަރު ކަމަށެވެ. އަދި މީގެ ކުރިން އާންމުންނަށް ލިބެން ނެތް އެތައް މަޢުލޫމާތެއް މިހާރު ފަސޭހަކަމާއެކު ބެލޭނެ އިންތިޒާމު ހަމަޖައްސާފައިވާކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، މަޢުލޫމާތު ހޯދައި ލިބިގަތުމުގެ ޙައްޤަކީ ރައްޔިތުންގެ އިތުބާރު ދެމެހެއްޓުމަށާއި، ޑިމޮކްރެޓިކް ނިޒާމެއް ހިންގުމަށް ބޭނުންވާ އެންމެ މުހިންމު ބިންގަލެއްގެ ގޮތުގައި މި ސަރުކާރުން ބަލައިގަންނަ ކަމެކެވެ.
"މިއީ ދެފުށްފެންނަ ގޮތަށް ހާމަކަންބޮޑު ގޮތެއްގައި ރައްޔިތުންނަށް ލިބެންޖެހޭ އަސާސީ މައުލޫމާތުތައް ފޯރުކޮށްދީ، ރައްޔިތުންގެ އިތުބާރު އިތުރުކުރުމަށް އެޅުނު މުހިއްމު ފިޔަވަޅެއް،" ރައީސް ވިދާޅުވި އެވެ.
މިއާއެކު، ރައީސް މުޢިއްޒު ވަނީ މި މަސައްކަތުގައި ބައިވެރިވި ހުރިހާ މުއައްސަސާތަކަށާއި ސަރުކާރުގެ އޮފިޝަލުންނަށް ޝުކުރު އަދާކުރައްވާފައެވެ.
އަދި ޑިޖިޓަލް ވަސީލަތްތައް މެދުވެރިކޮށް، ސަރުކާރުގެ ނިންމުންތަކުގައާއި މަސައްކަތްތަކުގައި ރައްޔިތުންގެ ބައިވެރިވުން އިތުރުކުރުމަށްޓަކައި، މަޢުލޫމާތު ހާމަކުރުމުގެ މަސައްކަތް އިތުރަށް ހަރުދަނާ ކުރައްވާނެ ކަމުގެ ޔަޤީންކަން އެމަނިކުފާނު ދެއްވިއެވެ.
"ސަރުކާރުގެ ހަރަކާތްތަކާއި ނިންމުންތަކުގައި ރައްޔިތުންގެ ބައިވެރިވުން އިތުރުކުރުމަށް ކުރާ މަސައްކަތް ހުއްޓުމެއްނެތި ކުރިއަށްގެންދާނެ ކަމުގެ ޔަގީންކަން އަރުވަން،" ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
