ވަރލްޑްކަޕް ފުޓްބޯޅަ މުބާރާތުގައި ރޭ މުބާރާތް ބާއްވާ އެއް ޤައުމުކަމަށްވާ ކެނެޑާ ކުޅުނު ފުރަތަމަ މެޗް އެއްވަރުވެގެން ނިމިއްޖެއެވެ.

މުބާރާތުގައި ކެނެޑާ ކުޅުނު ފުރަތަމަ މެޗްގައި ނިކުތީ ބޮސްނިއާ އާ ދެކޮޅަށެވެ. ޓޮރޮންޓޯގައި ކުޅުނު މިމެޗް ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ ބޮސްނިއާ އިންނެވެ. އެއީ 21 ވަނަ މިނެޓް ތެރޭގައި ތަޖުރިބާކާރު ޑިފެންޑަރު ކޮލަސިނެޗް ތަނަވަސްކޮށްދިން ފުރުސަތެއްގައި ޖޫވޯ ލޫކިޗް އެވެ. 

މެޗްގެ ފުރަތަމަ ހާފް 1-0 ގެ ނަތީޖާއިން ބޮސްނިއާ ކުރީގައި އޮވެގެން ނިމުނުއިރު، ދެވަނަ ހާފް ފެށުމާއެކު ކެނެޑާއިން ވަނީ މެޗް އެއްވަރުކުރަން ގިނަ ހަމަލާތަކެއް ބޮސް ބޮސްނިއާގެ ގޯލަށް އަމާޒުކުރަން މަސައްކަތްކޮށްފައެވެ. ނަމަވެސް މީގެ ތެރެއިން ގިނަ ހަމަލާތައް ބޮސްނިއާގެ ޑިފެންޑަރު ކޮލަސިނެޗް ވަނީ ދިފާއުކޮށްފައެވެ. އަދި ބައެއް ހަމަލާތައް ކީޕަރުވެސް ދިފާއުކުރިއެވެ.

މެޗްގައި ބޮސްނިއާއިން ލީޑް ނަގާފައިވަނިކޮށް ކެނެޑާއަށް އެއްވަރުކޮށްދިނީ، ބަދަލު ކުޅުންތެރިއެއްގެ ގޮތުގައި ކުޅެން އެރި ސައިލް ލާރިންއެވެ. މިމެޗް އެއްވަރުވެގެން ނިމުނުއިރު، މިއީ ވަރލްޑްކަޕް މުބާރާތުގެ މެޗެއް ބަލިނުވެ، ކެނެޑާއިން ނިންމާލި ފުރަތަމަ ފަހަރެވެ. މީގެ ކުރިން ކެނެޑާއިން ވަނީ ދެފަހަރެއްގެ މަތިން ވަރލްޑްކަޕް ކުޅެފައެވެ. އެއީ، 186 އަދި 2022 ވަނަ އަހަރެވެ. އެ ދެ މުބާރާތުންވެސް އެޓީމް ކުޅުނު މެޗުތަކުން ވަނީ ބަލިވެފައެވެ. 

މެޗްގައި ކެނެޑާއަށް ލަނޑުޖަހާނެ ރަނގަޅު ފުރުސަތުތައް ވަނީ ލިބި ބޭނުން ނުކުރެވި ގޮސްފައެވެ.