ގާނާގެ ވަރލްޑްކަޕް ސްކޮޑްގައި ހިމެނޭ ތޯމަސް ޕާޓޭއަށް ކެނެޑާއަށް ނުވަދެވޭނޭކަމަށް އެޤައުމުގެ އިމިގްރޭޝަނުން ނިންމައިފިއެވެ.

މީޑިއާތަކުން ރިޕޯޓްކޮށްފައިވާ ގޮތުގައި ޕާޓޭއަށް ކެނެޑާއަށް ވަނުމުގެ ހުއްދަ ކެނެޑާއިން ދީފައި ނުވަނީ، އޭނާގެ މައްޗަށް ހުށަހެޅިފައިވާ ރޭޕް މައްސަލައަކާ ގުޅިގެންނެވެ. ކުރިން އިނގިރޭސިވިލާތުގެ އާސެނަލް އަދި މިހާރު ސްޕެއިްނގެ ވިޔަރެއާލަށް ކުޅެމުން އަންނަ ޕާޓޭގެ މައްޗަށް ހުށަހެޅިފައިވާ ރޭޕްގެ މި ދައުވާތައް ކޮށްފައިވަނީ، 2025 ވަނަ އަހަރެވެ.

އިނގިރޭސިވިލާތުގެ ލަންޑަންގެ މެޓްރޯޕޮލިޓަން ފުލުހުން ވަނީ މި މައްސަލާގައި ރޭޕްގެ ފަސް ދަޢުވާއަކާއި ޖިންސީ ގޯނާގެ އެއް ދަޢުވާ ޕާޓޭގެ މައްޗަށް އުފުލާފައެވެ. މި ދައުވާތައް އުފުލިނަމަވެސް އެ އަހަރުގެ ސެޕްޓެމްބަރު މަހު އޭނާ ވަނީ މި ދަޢުވާތަކަށް އިންކާރުކޮށްފައެވެ. އެ ދައުވާތައް އޮއްވައި މި އަހަރުގެ ފެބްރުއަރީ މަހު ޕާޓޭގެ މައްޗަށް ރޭޕްގެ އާ ދެ ދަޢުވާއެއް އުފުލުނުއިރު، އޭނާ ވަނީ މި ދައުވާތަކަަށްވެސް އިންކާރުކޮށްފައެވެ.

ވަރލްޑްކަޕްގައި ގާނާ ކުޅޭ ފުރަތަމަ މެޗް އޮންނާނީ އަންނަ ބުދަ ދުވަހު ޓޮރޮންޓޯގެ ބީ.އެމް.އޯ ފީލްޑްގައި ޕެނަމާއާ ދެކޮޅަށެވެ. މި މެޗުން ގާނާގެ ވޯލްޑް ކަޕް ކެމްޕޭން ފަށާއިރު، ޕާޓޭއަށް ކެނެޑާއަށް އެތެރެ ނުވެވޭނެކަން މިހާރު ވަނީ ކަށަވަރުވެފައެވެ. އެހެންކަމުން އެ މެޗުގައި އޭނާއަކަށް ނުކުޅެވޭނެއެވެ.

ޕެނަމާ މެޗަށްފަހު މުބާރާތުގައި ގާނާ ދެން ކުޅޭނީ ޖޫންމަހުގެ 23 ވަނަ ދުވަހު ބޮސްޓަންގެ ޖިލެޓް ސްޓޭޑިއަމްގައި އިންގްލެންޑާ ދެކޮޅަށެވެ. އަދި ގްރޫޕް 'އެލް' ގެ ފަހު މެޗުގައި ޖޫން 27 ވަނަ ދުވަހު ފިލަޑެލްފިއާގެ ލިންކަން ފައިނޭންޝަލް ފީލްޑްގައި ކްރޮއޭޝިއާއާ ދެކޮޅަށް ކުޅޭނެއެވެ. އެމެރިކާގައި ކުޅޭ މި ދެ މެޗުގައި ބައިވެރިވުމުގެ ފުރުސަތު ޕާޓޭއަށް އެބައޮތްކަމަށް މީޑިއާގެ ރިޕޯޓްތައް ބުނެއެވެ.

ގާނާއިން މިފަހަރު ވަރލްޑްކަޕަށް އެކުލަވާލި ސްކޮޑްގައި ޕާޓޭ ހިމެނިއިރު، މުބާރާތުގެ ދެވަނަ ބުރަށް ދަތުރުކޮށްފިނަމަ، އެމެޗްގައިވެސް ޕާޓޭ ނުފެންނާނެއެވެ.