އިންޑިއާގެ އަސްކަރިއްޔާގައި ހިމެނޭ ވައިގެ ސިފައިންގެ މަތިންދާބޯޓެއް ވެއްޓި ފަސް މީހަކު މަރުވެއްޖެއެވެ.
އިންޑިއާގެ ވައިގެ ސިފައިންގެ ފަރާތުން އެކްސްގައި ނެރުނު ބަޔާނެއްގައި ބުނެފައިވަނީ، އިންޑިއާގެ އިރުއުތުރުގައި އޮންނަ އަސްކަރީ މަރުކަޒަކަށް ވައިގެ ސިފައިންގެ މަތިންދާބޯޓެއް ވެއްޓި، އިންޑިއާގެ ވައިގެ ސިފައިންގެ ފަސް މީހުން މަރުވެއްޖެއެވެ. މި ހާދިސާ ހިނގާފައިވަނީ، 50 މީހުންގެ ޖާގައިގެ 'އެންޓޮނޯވް އެން-32' މަރުކާގެ މަތިންދާބޯޓު އާސާމް ސްޓޭޓްގެ ޖޯރްހަޓްގައި އޮންނަ އެއާބޭސްއަށް ޖައްސަން އުޅުމުގެ ތެރޭގައެވެ. ނަމަވެސް، އެ ބަޔާނުގައި މި ހާދިސާގައި މަރުވި މީހުންގެ ތަފްސީލެއް ނުވަތަ ބޯޓުން ދަތުރުކުރި މީހުންގެ ޖުމްލަ އަދަދެއް ހާމަކޮށްފައެއް ނުވެއެވެ.
މީޑިއާގައި އާންމުވެފައިވާ ފޮޓޯތަކާއި ވީޑިއޯތަކުން ފެންނަ ގޮތުގައި، ބޯޓު ބިމުގައި ޖެހި ބޮޑެތި ގެއްލުންތަކެއް ވަނީ ލިބިފައެވެ. އަދި ބޯޓުގެ ބައިތައް ވަނީ ވަކިވެފައެވެ. މި ހާދިސާއާ ގުޅިގެން ކުއްލި ހާލަތުގައި ހަރަކާތްތެރިވާ ފަރާތްތަކާއި، ފަޔަރު ފައިޓަރުންނާއި ވައިގެ ސިފައިންގެ އިސްވެރިން ވަނީ އެ ސަރަހައްދަށް ގޮސް ބޮޑު އޮޕަރޭޝަނެއް ފަށާފައެވެ.
އިންޑިއާގެ ބައެއް މީޑިއާތަކުން ވަނީ ބޯޓު ވެއްޓުނު ސަރަހައްދުން ބޯ ކަޅު ދުން އަރަމުންދާ ތަނާއި، ބޯޓުގެ ބައިތައް ކުދިކުދިވެފައި އޮތް މަންޒަރުތައް ދައްކާފައެވެ. ހާދިސާ ހިނގިތާ އިރުކޮޅެއްގެ ތެރޭގައި ސިފައިން ވަނީ ބޯޓުގެ ބައިތަކުގެ ތެރޭގައި އެއްވެސް މީހަކު ސަލާމަތުން އޮތްތޯ ބެލުމުގެ މަސައްކަތް ފަށާފައެވެ.
"ޓެލެގްރާފް އިންޑިއާ" އިން ވަނީ ބޯޓު ވެއްޓުމުގެ ކުރިން ބާރުގަދަ ގޮވުމެއްގެ އަޑު އިވުނު ކަމަށާއި، އޭގެ ފަހުން މުޅި ސަރަހައްދު ދުމުން ފުރިގެންދިޔަ ކަމަށް ރިޕޯޓްކޮށްފައެވެ.
މި ހާދިސާއާ ގުޅިގެން މުޅި އެއާބޭސް ބަންދުކޮށް، އެތަނަށް ވަދެ ނިކުމެ އުޅުން މަނާކޮށްފައެވެ. އަދި މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި "ކޯޓް އޮފް އިންކުއަރީ" އެއް ހަދައި، ރަސްމީ ތަހުގީގެއް ފެށުމަށް ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
