މިފަހަރުގެ ވަރލްޑްކަޕް ފުޓްބޯޅަ މުބާރާތުގައި ސްޓޭޑިއަމްތަކުން ހުސް ގޮނޑި ފެންނަ މައްސަލާގައި ފީފާއިން ވަރަށް ތަފާތު ހުތްޖަތެއް ދައްކައިފިއެވެ.

ޓީވީން މުބާރާތުގެ މެޗްތައް ބެލި މީހުން ވަނީ ސްޓޭޑިއަމަށް ވަންނަ މީހުންގެ އަދަދު މަދުކަން ފާހަގަކޮށް، ސްޓޭޑިއަމުން ހުސްގޮނޑި ފެންނަ މިންފަރު އިތުރުކަން ފާހަގަކޮށްފައެވެ. މިކަމާ ގުޅިގެން ފީފާއިން ވަނީ، އެވާހަކަތައް ދިފާއުކޮށް ވާހަކަދައްކާފައެވެ. 

ފީފާއިން ބުނީ ސްޓޭޑިއަމްގައި މެޗް ބަލަންތިބޭ މީހުންގެ އަދަދު މަދުވެ ހުސްގަނޑި ފެންނަނީ، ދަނޑަށް ވަންނަ މީހުން އެމީހުންގެ ގޮނޑިތަކުގައި އިށީނދެ ތިބުމުގެ ބަދަލުގައި، ސްޓޭޑިއަމްގެ އެތެރޭގައި ހުންނަ ހިނގާ މަގުތަކުގައި މެޗްބަލަން ތިބޭތީކަމަށެވެ.

މިފަހަރުގެ މުބާރާތުގެ މެޗްތަކުގެ ޓިކެޓް އަގުބޮޑުކަމަށް ގިނަ ބަޔަކު ފާހަގަކުރާއިރު، މުބާރާތުގެ އެތައް ހާސް ޓިކެޓް އަދިވެސް ނުވިކި ހުރިކަމަށް މީޑިއާތަކުން ވަނީ ރިޕޯޓްކޮށްފައެވެ. މިފަހަރުގެ މުބާރާތުގެ ޓިކެޓުގެ އަގުތަކަށް ބަލާއިރު، އެންމެ އަގުހެޔޮ ޓިކެޓެއްވެސް އުޅެނީ 867 ޑޮލަރަށެވެ. ވީ.އައި.ޕީ ލައުންޖާއި ކެއުން ހިމެނޭ ޕެކޭޖުތަކުގެ އަގު 9,225 ޑޮލަރަށް އަރާއިރު، ފީފާގެ ވެބްސައިޓުގައިވާ 'ހޮސްޕިޓަލިޓީ' ޓިކެޓުތަކުގެ އަގު އުޅެނީ 2,430 ޑޮލަރާއި 3,150 ޑޮލަރާ ދެމެދުގެ އަގުތަކެއްގައެވެ.

ފީފާގެ ރައީސް ޖިއާނީ އިންފަންޓީނޯ ވަނީ ޓިކެތްގެ އަގުބޮޑުވާކަމަށް ދެކެވޭ ވާހަކަތައް ދިފާއުކުރައްވާފައެވެ. އެގޮތުން ޓިކެޓްގެ  ޓިކެޓެއްގެ އެވްރެޖް އަގު 500 ޑޮލަށް އަރާއިރު، މި އަގުތަކަކީ އެމެރިކާގައި ބާއްވާ ބޮޑެތި ކުޅިވަރު މުބާރާތްތަކުގެ އަގުތަކާ އެއްވަރުގެ އަގުތަކެއް ކަމަށް އޭނާ ވަނީ ވިދާޅުވެފައވެެ.  އިންފަންޓީނޯ ވިދާޅުވީ ޓިކެޓްގެ އަގު ހެޔޮކޮށްފިނަމަ ބްލެކް މާކެޓުގައި މާ ބޮޑު އަގުގައި ޓިކެޓު ވިއްކާނެ ކަމަށާއި، އޭރުން އެ ފައިސާ ފުޓްބޯޅައަށް ލިބުމުގެ ބަދަލުގައި ދާނީ ވަގަށް ޓިކެޓު ވިއްކާ މީހުންގެ އަތަށް ކަމަށެވެ.

ޓިކެޓުގެ އަގު އިންތިހާއަށް ބޮޑުވުމުގެ ސަބަބުން ސްޓޭޑިއަމްތަކަށް ވަންނަ މީހުން މަދުވެ، މުބާރާތުގެ ފޯރި ކުޑަވެގެންދާނެ ކަމުގެ ބިރު މިހާރު ވަނީ ހީވެފައެވެ. މުބާރާތް ފެށުމުގެ ކުރިން ފީފާއިން ވަނީ ޓިކެޓް ހޯދުމަށް 500 މިލިއަން މީހުން އެދުނުކަން ފާހަގަކޮށްފައެވެ.