ފީފާ ވޯލްޑް ކަޕްގެ ގުރޫޕް އެފްގެ ފުރަތަމަ މެޗުގައި ޓިއުނީޝިއާގެ މައްޗަށް 5-1 އިން ކުރި ހޯދައި ސްވިޑެން އިން ގުރޫޕްގެ އެއްވަނައަށް ޖެހިލައިފިއެވެ.

ގްވާދަލޫޕޭގައި ކުޅުނު މި މެޗުގައި ސްވިޑެންގެ ލީޑު ފެށީ ހަތްވަނަ މިނެޓުގައި ޔަސީން އަޔާރީ ޖެހި ގޯލުންނެވެ. ވިކްޓާ ޔޯކެރޭޒް ފޮނުވާލި ބޯޅަ ޓިއުނީޝިއާގެ ޑިފެންޑަރު ބްލޮކް ކުރި ވަގުތު އޭރިއާ ބޭރުން ލިބުނު ބޯޅަ ގޯލަށް ފޮނުވާލީ އަޔާރީއެވެ. އޭގެ ފަހުން 30 ވަނަ މިނެޓުގައި އެލެކްޒެންޑާ އީސާކް ލީޑު ފުޅާކޮށްދިނެވެ. ނަމަވެސް ފުރަތަމަ ހާފް ނިމެން ގާތްވެފައި ވަނިކޮށް ހަނިބަލް މެޖްބްރީ ނަގައިދިން ހުރަހަކުން 43 ވަނަ މިނެޓުގައި އޮމަރް ރެކީކް ޓިއުނީޝިއާއަށް ފަރަގު ކުޑަކޮށްދިނެވެ.

ދެވަނަ ހާފުގެ 59 ވަނަ މިނެޓުގައި ޔޯކެރޭޒް ސްވިޑެންގެ ތިންވަނަ ލަނޑު ޖެހިއިރު 84 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް މަޓިއަސް ސްވަންބާގް ވަނީ ދަނޑަށް ނުކުތްތާ އެންމެ 18 ސިކުންތު ތެރޭ ހަތަރުވަނަ ގޯލު ޖަހައިފައެވެ.

ފުރަތަމަ އޮފްސައިޑް ކަމަށް ނިންމި ނަމަވެސް ވީއޭއާރު ރިވިއުއަށް ފަހު އެ ގޯލު ބަލައިގަތެވެ. އިތުރު ވަގުތުގެ ހަވަނަ މިނެޓުގައި އަޔާރީ ބްރޭސް ނަތީޖާ ހަމަކޮށް ފަސްވަނަ ލަނޑު ޖެހިއެވެ. ޓިއުނީޝިއާ އާއި މޮރޮކޯ ނަސްލުގެ ސްވިޑެންގައި އުފަން އަޔާރީ ފުރަތަމަ ގޯލަށް ފަހު އުފާފާޅުކޮށްފައެއް ނުވެއެވެ. ނަމަވެސް ދެވަނަ ގޯލަށް ފަހު ޝުކުރުގެ ސަޖިދައަކަށް ތިރިވިއެވެ.

މި މެޗުގައި ޔޯކެރޭޒް ގޯލެއް ޖެހުމުގެ އިތުރުން އީސާކްގެ ގޯލު އެސިސްޓް ކޮށްދިންއިރު އީސާކް ވަނީ ޔޯކެރޭޒް އާއި ސްވަންބާގްގެ ގޯލު އެސިސްޓް ކޮށްދީފައެވެ. އެންމެ ފަހުން ބޭއްވި ގަތަރު ވޯލްޑް ކަޕުން ފުރުސަތު ނުލިބުނު ސްވިޑެން އިން ތިން ޕޮއިންޓާ އެކު ގުރޫޕްގެ ކުރީގައި އޮތްއިރު ނެދަލެންޑްސް އާއި ޖަޕާން ވަނީ ރޭ 2-2 އިން އެއްވަރުވެފައެވެ.