ކްލަބް ވޯލްޑް ކަޕް ގުރޫޕް އެފްގެ ފުރަތަމަ މެޗުގައި ނެދަލެންޑްސް އިން ދެ ފަހަރަށް ލީޑު ނެގި ނަމަވެސް ޖަޕާނުން ފަހަތުން އަރައި މެޗު 2-2 އިން އެއްވަރުކޮށްފިއެވެ.

އާލިންޓަންގައި ކުޅުނު މި މެޗުގެ ފުރަތަމަ ހާފު ލަނޑެއް ނެތި ނިމުނު ނަމަވެސް ނެދަލެންޑްސްގެ ޑޮންޔެލް މާލަން ވަނީ ނުރައްކާތެރި ދެ ހަމަލާއެއް ފޮނުވާލައިފައެވެ. އެ ދެ ހަމަލާ ވެސް ދިފާއުކުރީ ޖަޕާންގެ ކީޕަރު ޒިއޯން ސުޒުކީއެވެ. ދެވަނަ ހާފުގެ ހަވަނަ މިނެޓުގައި ރަޔާން ގްރަވެންބްރެކް ހުރަސްކޮށްލި ބޯޅައަކުން ނެދަލެންޑްސްގެ ކެޕްޓަން ވާޖިލް ވެން ޑައިކް ގޯލު ޖަހައި ލީޑު ނެގިއެވެ. ނަމަވެސް ހަ މިނެޓު ފަހުން ޓަކެފޫސާ ކޫބޯ ދިން ބޯޅައަކުން ކެއިޓޯ ނަކަމޫރާ އޭރިއާ ބޭރަށް ޖެހިލައި ގޯލުގެ ތިރީ ކަނަށް އަމާޒުކޮށް ޖަޕާނަށް ނަތީޖާ ހަމަހަމަކޮށްދިނެވެ.

64 ވަނަ މިނެޓުގައި ކްރަސެންސީއޯ ސަމަވިލް ގައުމީ ޓީމަށް ޖެހި ފުރަތަމަ ގޯލާ އެކު ނެދަލެންޑްސް އިން އަލުން ލީޑު ނެގިއެވެ. އެހެން ނަމަވެސް މެޗުގެ 88 ވަނަ މިނެޓުގައި ކޯނަރަކުން ކޮކީ އޮގާވާ ބޮލުން ފޮނުވާލި ބޯޅަ ޑައިޗީ ކަމާޑާ ބޮލުގައި ޖެހިފައި ވަދެ ޖަޕާނަށް ދެވަނަ ފަހަރަށް ނަތީޖާ އެއްވަރުކޮށްދިނެވެ.

ގުރޫޕް އެފްގައި ޖަޕާނާއި ނެދަލެންޑްސްގެ އިތުރުން ދެން ހިމެނެނީ ސްވިޑެން އާއި ޓިއުނީޝިއާއެވެ.