ވޯލްޑް ކަޕް ގުރޫޕް އީގައި އިކުއެޑޯއާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އެރި މެންޗެސްޓާ ޔުނައިޓެޑުގެ ފޯވާޑް އަމަޑް ޑިއާލޯ 90 ވަނަ މިނެޓުގައި ޖެހި ގޯލުން އައިވަރީ ކޯސްޓް 1-0 އިން މޮޅުވެއްޖެއެވެ.

ފިލަޑެލްފިއާގައި ކުޅުނު މި މެޗުގައި 56 ވަނަ މިނެޓުގައި ކުޅެން އެރި އަމަޑް މެޗުގެ މޮޅު ގޯލު ކާމިޔާބުކުރީ ވިލްފްރެއިޑް ސިންގޯ ދިން ބޯޅައަކުންނެވެ. ފުރަތަމަ ހާފުގައި އިކުއެޑޯގެ ޖޯން ޔެބޮއާ އާއި އެލަން މިންޑާގެ ހަމަލާ ގޯލުގެ ހުރަސް ދަނޑިއަށް އަމާޒުވިއިރު ދެވަނަ ހާފުގައި އެނާ ވެލެންސިއާގެ ހަމަލާ ގޯލުގެ ދަނޑިއަށް އަމާޒުވިއެވެ.

އިކުއެޑޯއަށް ފުރަތަމަ ފަހަރަށް ހަމަލާއެއް އޮން ޓާގެޓަށް ފޮނުވާލެވުނީ ފުރިހަމަ ވަގުތު ހަމަވާން ވިއްސަކަށް މިނެޓަށް ވެފައި ވަނިކޮށެވެ. ނަމަވެސް އައިވަރީ ކޯސްޓުގެ ގޯލްކީޕަރު ޔަހްޔާ ފޮފާނާ ވަނީ ގޮންޒާލޯ ޕްލާޓާގެ ހަމަލާ ދިފާއުކޮށްފައެވެ. ދެވަނަ ހާފުގެ ކުރީކޮޅު އައިވަރީ ކޯސްޓުގެ ފޯވާޑް އެލްޔޭ ވާހީގެ ހަމަލާއެއް ވެސް ގޯލުގެ ދަނޑިއަށް އަމާޒުވިއެވެ.

މި ނަތީޖާއާ އެކު އިކުއެޑޯ ބަލިނުވެ ދެމެހެއްޓި 19 މެޗުގެ ސިލްސިލާ ނިމުމަކަށް އައީއެވެ. އެ ޓީމު އެންމެ ފަހުން ބަލިވީ 2024 ވަނަ އަހަރުގެ ސެޕްޓެމްބަރުގައި ވޯލްޑް ކަޕް ކޮލިފައިންގައި ބްރެޒިލް އަތުންނެވެ. އެ މުއްދަތުގައި އިކުއެޑޯ ވަނީ 12 ކްލީން ޝީޓް ހަދައިފައެވެ.

ޑިޑިއޭ ޑްރޮގްބާގެ ކެޕްޓަންކަމުގައި 2006 2010 އަދި 2014 ގައި ވާދަކުރި އައިވަރީ ކޯސްޓް އެއަށް ފަހު ވޯލްޑް ކަޕެއްގައި ކުޅޭ މިއީ ފުރަތަމަ ފަހަރެވެ. އެންމެ ފަހު ދެ މުބާރާތަށް އެ ޓީމު ކޮލިފައިނުވެއެވެ. 2014 ގައި މުބާރާތުގެ ފުރަތަމަ މެޗުން ޖަޕާން 2-1 އިން ބަލިކުރި ނަމަވެސް ދެން ކުޅުނު މެޗުތަކުގައި ކޮލަމްބިއާ އާއި ގްރީސް އަތުން މޮޅެއް ނުހޯދުނެވެ.

މި ފަހަރު ހޯދި މޮޅާ އެކު އައިވަރީ ކޯސްޓަށް ފުރަތަމަ ފަހަރަށް ވޯލްޑް ކަޕުގެ ނޮކައުޓް ބުރުގެ އުންމީދު ބޮޑުވެއްޖެއެވެ. ގުރޫޕް އީގައި ޖަރުމަން ވަނީ ފުރަތަމަ މެޗުގައި 7-1 އިން ކިއުރަސާއޯ ބަލިކޮށްފައެވެ. އައިވަރީ ކޯސްޓަށް ގުރޫޕް ސްޓޭޖުގައި ދެން އޮންނާނީ ޖަރުމަނާއި ކިއުރަސާއޯއާ ބައްދަލުކުރާ މެޗެވެ.