ވެރިކަންކުރާ ޕީއެންސީގެ މަތީ މަޖިލިސް (ކޮންގްރެސް) ސެޕްޓެންބަރު މަހުގެ 15 އިން 18 އަށް ބޭއްވުމަށް ނިންމައިފިއެވެ.

މިކަން އިއުލާން ކުރެއްވީ މިއަދު އޮތް އެޕާޓީގެ ނޫސްވެރިންގެ ބައްދަލުވުމުގައި ޗެއާޕާސަން އަބްދުއްރަޙީމް އަބްދުالله އެވެ.

އަބްދުއްރަޙީމް ވިދާޅުވީ މަތީ މަޖިލިސް ބޭއްވުމަށް ވާންޖެހޭ ތައްޔާރީތައް ވުމަށް ސްޓިއަރިން ކޮމިޓީއެއް މިހާރު އެކުލަވާލެވިފައިވާ ކަމަށާ، އެ ކޮމިޓީގައި ޖުމްލަ 13 މެމްބަރުން ތިބޭނެ ކަމަށެވެ.

މީގެ އިތުރުން، މަތީ މަޖިލީހަށް ތައްޔާރުވުމުގެ ގޮތުން، ބައެއް މަގާމުތަކަށް ބޭފުޅުން އައްޔަނު ކުރުމަށް ނިންމާފައިވާ ކަމަށާ، އެ މަގާމުތަކަށް މިއަދުން ފެށިގެން މިމަހު 30 ވަނަ ދުވަހަށް ކުރިމަތިލުމުގެ ފުރުސަތު އޮންނާނެ ކަމަށް އަދުރޭ ވިދާޅުވިއެވެ.

ކުރިމަތިލާން ހުޅުވާލެވިފައިވާ މަގާމުތައް

1) ދާއިރާގެ ރައީސުން (ޕީއެންސީ މަޖިލިސް މެންބަރުން ނެތް ދާއިރާތަކަށް)

2) ދާއިރާގެ ނާއިބު ރައީސުން

3) އަންހެނުންގެ ހަރާކާތުގެ ރައީސުން

4) ސްޓިއަރިން ކޮމިޓީގެ މެންބަރުން

5) ޒުވާނުންގެ ހަރަކާތުގެ ރައީސުން

މަގާމުތަކަށް ކުރިމަތިލެވޭނީ ޚާއްސަ ޕޯޓަލް އެއް މެދުވެރިކޮށް ކަމަށާ، އެ ޕޯޓަލް މިއަދު އިފްތިތާޙް ކުރެވޭނެ ކަމަށް އަދުރޭ ވިދާޅުވިއެވެ. އަދި މަގާމުތަކަށް ކުރިމަތިލެވޭނީ މިއަދުގެ ނިޔަލަށް ޕާޓީގެ މެންބަރުންގެ ގޮތުގައި ތިބި މީހުންނަށް ކަމަށްވެސް ވިދާޅުވިއެވެ. 

އަދުރޭ އިތުރަށް ވިދާޅުވީ އެމަގާމުތަކަށް މީގުން ހޮވާ އިންތިޚާބި އޮންނާނީ 11 ޖުލައިގައި ކަމަށާ އެ އިންތިޚާބުގައި ވޯޓުލެވޭނީ މިއަދުގެ ނިޔަލަށް މެންބަރުންގެ ގޮތިގައި ތިބި މީހުންނަށް ކަމަށެވެ. 

އިންތިޚާބާ ގުޅޭ އިތުރު މައުލޫމާތު ޕީއެންސީގެ ވެބްސައިޓުން ލިބޭނެ ކަމަށް އަދުރޭ ވިދާޅުވިއެވެ.